Kum rei tak chhung an thawm a reh vang vang hnuah Blue Corn an rawn kir leh ta a, hla thar an rawn chhawp chhuak. An hla thar hi 'Luah Loh Zun' tih a ni a, YouTube lamah en theihin a awm. 

Blue Corn music video thar hi Zirtawpni khan tihchhuah a ni a, an YouTube channel-ah en theihin a awm. Darkar 15 chhung lekin view nuai chuang an nei thei a, hei hian mipui rilruah Blue Corn a la thih loh zia a nemnghet chiang hle. 'Luah Loh Zun' hi Kim Kimi phuah a ni a, music hi Ephraim Malsawma kutchhuak a ni. Recording hi Kings and Prophets-ah tih niin, video hi WoWv Production kutchhuak a ni bawk. 

Blue Corn hian hla hit tak tak an lo tichhuak nual tawh a, chung zingah chuan - Lunglawm a kim, Aw Bawihte, Di Hlui, Kumtluang Atan, Hrilh ka hai ngei leh Hmangaih Mengmawite te chu a lar zual an ni. Krismas hla 'Krismas nang nen' tih ngat phei chu Mizo hla chuai thei tawh lo tur zinga mi a ni.