ZALEN January 14, 2025 : ZORO chuan January 1, 2025 atang India sawrkarin a keng kawh tan Free Movement Regime (FMR) an hriat veleh pawi a tih zia leh he thil hi thiat leh ngei tura a duh thu thuchhuah an siam bakah Human Rights Council leh UN Permanent Forum on Indigenous Issue-ah pawh a thlen nghal an ti a. Border Pass pe tura Assam Rifles hman chu mak an tih thu an sawi.

Vawiin chanchinthar lakhawmtute an kawm naah ZORO chuan India sawrkar laipui chuan Zofa ram hrang hranga chengte zalen taka intlawh pawh theihna Free Movement Regime chu thiatin ramri kan tur reng rengte tan Border Pass neih ngei a tul leh Border Pass neilo tan ramri kan a theih lohna dan chu January 1, 2025 atangin a keng kawh tan a. ZORO-in a hriat veleh pawi a tih zia leh he thil hi thiat leh ngei tura a duh thu thuchhuah a tichhuah nghal bakah Human Rights Council leh UN Permanent Forum on Indigenous Issue-ah pawh a thlen nghal bawk, an ti.

ZORO chuan, "India Sawrkar laipui chuan ramri-a inkal pawhna tur Entry/Exit points 18 ruatin chung zinga 2 chu Pilot sites atan leh Phase I-ah hmun 3, Phase II-ah hmun13 a ruat fel a. (copy thil tel) Ramri kan theihna tur chhuanlam atan- unaute tlawh, khualzin (tourism), sumdawnna, infiamna, official duty, medical treatment, Border Trade Affairs, Attending seminars, meetings or conferences leh Cultural Exchanges programmes te an ni tih a tarlang a. Border Pass nei thei tura a tarlante chu ramri atanga Km. 10 huam chhunga mi chauh an ni."

"Border Pass dam hun chhung tur pawh ni 7 chhung a bituk nghal a, heng Pass te hi ni 7 ral hmain mahni lakna hmunah thehluh leh ngei tur a ni bawk. Border Pass dil tu chu ramri atanga Km. 10 chhunga mi a ni ngei tur a ni a, a Proof-na (Proof of identity) Police Post atangin emaw, a chenna khaw hotute hnen atangin a neih ngei a ngai bawk. Thil mak tak chu Border Pass pe thei tur chu Civil Officer/ Magistrate ni awm tak a ni nain pe theitu tura ruat (designated Officer) Assam Rifle-in a pe chhuak dawn a ni," an ti.