Aizawl July 12, 2023 : Congress South Tuipui Block Conference, Hnahthial Bazar a neiha hun thusawitu Brig. T. Sailo-a tuna Meriam L. Hrangchal chuan Brig. Thenphunga Sailo Policy tihhlawhtlin a nih theih nan Congress-ah a lut tih a sawi a, T. Sailo-a Policy tuipuitute leh PC Party te lut ve turin a sawm bawk.

Deputy Chief Minister pawh lo ni tawh Lalhmingthanga fanu Meriam L. Hrangchal chuan, "Ka pa, Lalhmingthanga khan Pu Ṭhenphunga policy kha a tuipui em em a, kei ngei pawhin ka tuipui a ni. Pu Ṭhenphunga policy ti hlawhtling turin Congress Party ah ka lut a, Pu Ṭhenphunga Policy tuipuitu leh PC Party zawng zawngte pawh Pu Ṭhenphunga Policy tih hlawhtlina a awm theihna tur atana Congress Party a rawn lut vek turin ka sawm che u a ni," a ti.

Mizoram-a Vestige Company enkawltu Meriam L. Hrangchal chuan,"Eizawnna pangngai tak ka nei a. Ka tan politics-a sum leh pai zawn buai hi a ngai lo. Pathian zarah ka sumdawnnaah kan chhungkaw eikhawp chu kan la thawk chhuak ve thei. Nimahsela, kan ram, kan hnam, kan sakhua hi chhan a ngai nia ka hriat avanga politics-a rawn zuang lut ka ni. BJP te hian kan ram an ti chhe mek a. Kan hnam, kan sakhua min nekchep tumin hma an la mek a. India ram hi Hindu lal rama siam an tum a ni. Chuvangin, theihtawp chhuaha BJP do turin Congress Party-ah lut ka ni," a ti bawk.