Aizawl January 13, 2024: Vawiin khan Chief Minister Lalduhoma chuan CM Conference Hall-ah British Army nih tuma inbuatsaih Inspired Agency te buaipuia dilna thehlut mek Mizo thalaite a kawm.

Chief Minister chuan duhsakna hlanin, British Army nih tum heti zat chu lawmawm a ti a, "In chhuanawm hle a ni," a ti. British Army a mizo thalaite an luh theih dan tur sawia Deputy High Commissioner, incharge of east India nena tunhnaia an inkawmna chanchin a hrilh a. Deputy High Commissioner hi rawn zin a tum a, an thil kalpui dan te chipchiara ziaka pe tur leh an harsatna te lo sawipui a tum thu a hrilh. Sawrkar atanga puihna an beisei te pawh an chanchin chipchiar an lo zir hnuah sawiho leh dawn, tiin a chah.

Thalai mi 43 te hian commonwealth countries atanga British sipai luh theihna dan hmangin application an thehlut a. British sawrkarin dilna lehkha an kaltir dan hi a inan vek loh avangin an dilna thlen chin te hi an inchen vek lo a ni. An zingah hian mi pakhat chuan February ni 29 a assesment (medical, physical leh written test) nei turin engkim a paltlang tawh a, visa pawh a hmu tawh a, kal turin a inpuahchah mek a ni. Midang 10 ten assesment neih hun tur an nghak mek a, midang te dilna pawh hi buaipui (process) mek an ni hlawm Qualification hi pawl 12 chin, feet nga tling an ni tur a ni.