ZALEN July 28, 2023 : Vawiin khan Nick Low, British Deputy High Commissioner, Kolkata chuan Central YMA Office a tlawh a. Central YMA President R. Lalngheta hovin OB leh CEC member thenkhatten an lo dawngsawng a, YMA te tha thawh thin ropui a tih thu Low hian a hrilh.

British Deputy High Commissioner Nick Low chuan Kolkata atanga India ram chhung State 13, a bial chhunga awmte tlawhchhuakin ram mipuite a kawm kual thu a sawi a. YMA ten Mizo mipuite tana an hnathawh thin chu ropui a tihzia thu leh a ngaihsan thute sawiin tun hnaia an tualchhung buaina avanga Myanmar, Bangladesh leh Manipur atanga raltlante Mizoram in a lo dawngsawn thin chungchangah YMA tena an tha thawh thin pawh ropui a tih zia thu uar takin a sawi a ni.

Central YMA hruaitute chuan Mizo thalaite tana British Army-a an luh theih dan tur te, Doctor leh Nurse te tan bakah entrepreneurship lama tui Mizo thalaite tan British rama hna an thawh theih dan turte an lo sawipui a. Scheme hrang hrang hnuaia an kalpui theih dante Nick Low hian a hrilh a ni.