Aizawl: Tripura transit camp-a khawsa mek Bru chhungkaw 4323-te chuan Mizoramah let an duh a. Bru hruai kir hna hi rokhawlhna a awm loh chuan October 10, 2019 atangin thawh tan tum a ni.

Zalen palaiin Home Department thawktute hnen atanga thu a dawn danin tun hnaia Mizoram mi leh sa endik hna Tripura camp hrang hrang Kaskau, Hamsapara, Asapara, Khakchangpara, Hazachera leh Naisingpara-a neihah chhungkaw 4323-te chuan Mizorama let an duh thu hi an sawi a. Endik zingah hian chhungkaw 350-te chu enfiah leh tura tih an ni.

Home Department Additional Secretary Lalbiaksangi chuan endik tawh zingah an document neihte atanga Mizoram khua leh tuia pawm mai theih mi eng emaw zat an awm tawh niin Zalen a hrilh a, “Bru kan enfiah chinah Mizorama let duh lo an awm kan hre lo a; mahse, kan enfiah chin hi an la tlem avangin hun remchang hmasa berah Tripura sawrkar nen kan endik leh dawn a, a hun erawh a la hriat loh a ni,” a ti.

Addl. Secretary Home chuan Bru hruai kir hun atan October 10, 2019 tinzawn chhin a ni tih a sawi a. “Hna tul angte kan thawh zawh theih bakah Home Ministry-in pawisa mamawhte min pek theih chuan hun tiamah hian hna tan hman kan tum a ni,” a ti bawk. Kum 2016 khan Mizoram mi leh sa nia hriat Bru endik hna hi kalpui a lo ni tawh a, hemi tum hian chhungkaw 5369 zinga chhungkaw 4278 inlanin chhungkua 1091 an inlan lo a ni.

Tripura-a khawsa mek Bru-te hi Mizoram district pathum - Kolasib, Mamit leh Lunglei district-a anmahni khaw ngaiah theuh dah leh tum an ni a. Thudawn danin nikum 2018-a Bru hruai kir (repatriation)-ah Bru chhung kaw 22-te Lunglei district-ah hruai kir an ni tawh a, tun dinhmunah Lunglei district-a rawn let tur chhungkaw 371 an la awm a, hengte hi khaw pali - Putlungasih, Chawilung S, Dinthar leh Buknuamah hruai kir an ni ang. Bru-te let tamna ber tur, Mamit district-ah chuan chhung kaw 4185 let tur an awm a.

Kolasib-ah chuan chhungkaw 822 lak let tur awmin khaw 10 - Dilzau, Saihapui (K), N.Thinglian, Hortoki, Pangbalkawn, Bairabi (Zophai), Bukvannei, Meidum, South Chhimluang leh Zodin (Rastali)-ah te dah tum an ni bawk a ni.