Aizawl; Bible Society of India, Aizawl Auxiliary chuan kum 2021-2022-a an target chu Rs. 11,84,380-in an khum a. BSI hian Mizo tawng leh saptawng awm kawp Bible chhuah tumin an buaipui mek.

ZALEN-in Bible Society of India, Aizawl Auxiliary Secretary Rev. Remlalfaka hnen atanga thu a dawn danin kum 2021-22 a BSI Aizawl target hi Rs. 3,36,28,000 a nih laiin sum hmuh zawng zawng chu Rs. 4,11,84,380 a tling a, target hi Rs. 11,84,380-in an khum tih a sawi. Rev. Mafaka chuan, “Kan sum hmuh hi tam viau mah sela kum hmasa lam kan phak lohna hi Rs. 39,80,222 lai a ni a, hei hi a chhan ber chu hri leng avanga mi ina luh a rem loh vang leh hmalak a harsat vang a ni a. ‘Kan target hi kan hmu pha lo mai awm mang e aw,’ kan ti hial a; mahse, Pathian thiltih mak a thleng a, heti zata kan khum thei hi kan lawm hle a ni,” a ti.

Rev. Remlalfaka chuan target hmu phak lo branch eng emaw zat an awm laiin khum thahnem tak an awm avangin nuai 11 chuangin target hi an khum thei niin a sawi.

Bible Society of India, Aizawl Auxiliary hmalak mekna leh hmachhawpte sawiin Rev. Remlalfaka chuan, “Tunah hian Mizo tawng leh saptawng awm kawp Bible (diglot with esv) kan buaipui mek a, hri leng vangin hmalak chak a har a, kan peih hun tur kan la sawi mai thei lo a ni,” a ti a. Hei bakah hian Mizo Bible lehlin thar chu en that ngai a awm avangin an en tha lek mek tih a sawi a. Mara Bible an en leh mek bakah Bishu Priya tawng hmangin Thuthlung Thar lehlin hna an thawk mek niin a sawi bawk.

    Bible Society of India, Aizawl Auxiliary hi kum 2020-21 khan India rama auxiliary zingah target hmu tha ber a ni a, 2021-22-ah pawh hian a titha ber a nih leh beisei a ni.

* Bible Society of India, Aizawl Auxiliary hian Mizoram bakah Tripura leh Assam-a Hailakandi, Karimganj leh Cachar district a huam. 

* Kum 2021-22 chhung khan branch zingah Aizawl North II chuan sum hmu hnem berin Rs. 10,35,803 an hmu a, Kohhran malah chuan Chanmari PCI-in hmu hnem berin Rs. 9,58,863 an thawk chhuak.

* Bible House, Upper Khatla chu a chhiat avangin tunah hian MUP office bulah Bible House hi sak leh mek a ni a. Sawrkar atangin Rs. nuai 407 hmangin bultan a ni a, sa zo turin Rs. nuai 600 vel la ngai tura ngaih a ni.