May 20, 2022; Buarpui nu huaisen, India rama huaisen chawimawina 'Shaurya Chakra' pawh lo dawng tawh, Sakei chek hlumtu Pi Zadingi (70) chuan 'Ril cancer' a buan mek a, vawi engemawzah chemo khai tawhin, zai pawh a tawk tawh. "Pathianin hling min pe a, tul a tih chuan a khei chhuak leh mai ang...Pathiah-ah chauh lo chuan innghahna tur a awm lo a, Amah chu kan innghahna ber tur a ni tihte min hmuhchhuahtir a, ka rilru a dam khawp mai," tiin Pi Zadingi chuan ZALEN a hrilh.

Insawiselna neuh neuh a neih avangin nikum lam khan a incheck-up a, chutah chuan a 'Ril' a cancer tih hriatchhuah a ni. Aizawl ah chemo vawi 3 a khai hnuin, nikum December ni 1 khan civil hospital, Aizawl ah zai a ni. Chumi hnu-ah chemo vawi 3 khai leh tawhin, kumin July ah a incheck-up leh ang.

Lunglei district chhung Buarpui khua-ah tunah hian a tu leh fa te nen an khawsa mek a, nikum July ni 19 khan a pasal, pu PC. Lalthanmawia chuan cancer vangin a lo boral san tawh a ni.

Kum 27 mi chauh a nih lai, July 3, 1978 ah Hreipuiin sakei a chekhlum a, chawimawina tangkapui 'Shourya chakra' chu kum 1980 khan India President hnen atanga dawngin, he tangkapuiin a ken tel pawisa chu a tirah chuan Rs.40/- a la thin a, tunah erawh Rs. 3,000/- ah a pung tawh.

A Sakei chehhlum hi a vun lip in an tiro a, an kawl tha reng thin a, Forest department chuan dah that turin an lak sak a, Aizawl Museum-ah dah a ni. Nikum lam khan Aizawl a inenkawla a awm laiin Forest department chuan Rs. 5,000 in an kan nghe nghe. Museum ami hi Pi Zadingi chuan a la hmu ve lo tih ZALEN a hrilh.