Aizawl: Speaker Lalrinliana Sailo hova Business Advisory Committee thukhawm chuan Mizoram Legislative Assembly budget session-a hun hman dan tur an duangfel tawh a. Session hi February ni 22,2022 atanga tanin March ni 10,2022 thleng neih tur a ni ang.

Speaker hova BAC in session calendar an duan ah hian session hi ni 12 chhung neih a ni dawn a, session tan ni hian Larsap in house ah thu a sawi ang. BAC in ruahmanna an siam dan chuan Feb. ni 23 ah session neih kar laka thi te sunna hun hman a ni ang a, thudawn danin MLA hlui Saitlawma, Hrangthanga Colney leh C.Ramhluna te sun an ni ang. 

Sunna hun hman zawh hian zawhna leh chhanna hun hman a ni ang a, hemi zawh hian Governor thusawi chunga lawmthu sawina motion chu sawihova pass tum a ni ang. Ni 24.2.2022 ah Finance Minister in kum 2022-2023 sum hman tur budget leh kum 2021-2022  sawr-kar sum indaihloh phuhrukna tur (supplemetary demand) a pharh ang a, ni 25.2.2022 ah zawhna leh chhanna hun hman zawhah private member resolution sawiho a ni ang. Ni 28.2.2022 leh 1.3.2022 ah te budget a tlangpuia sawihona (general discussion) neih a ni ang a, ni 2.3.2022 atangin Minister hrang hrang te demand sawihoa pass tum a ni ang.

Zirtawpni tlai thleng khan session a ngaihtuah tur hian bill 4 a lut tawh a. House a chhan chi zawhna (starred question) 465 leh ziaka chhan chi zawhna (unstarred question) 258 a lut tawh bawk a ni.