Aizawl July 23, 2024: Agriculture and Farmers Welfare Department chuan vawiin khan leilet neitute buhhum thar chhuah leisak kawnga hmalakna 'Paddy Procurement Programme' chungchanga pawimawhte inhrilhhriatna hun an hmang a, khuallian PC Vanlalruata chuan buhhum lei turin zirchianna kalpui mek a nih thu a sawi.

'Sensitization Programme on Implementation of Paddy Procurement' ah hian khuallian Agriculture and Farmers Welfare Minister PC Vanlalruata chuan Mizoram Sawrkarin tunhnaiah Chief Minister kaihhruai 'The Mizoram State Government Paddy and Rice Procurement Committee' a din tih a sawi a, hemi hnuaia din Task Force chuan loneitu atangin buhhum leh buhfai leisak theih a ni em tih a zirchiang dawn a ti a. Sawrkarin support price siamin thlai pali lei tura ruahmanna a kalpui thu sawiin, hemi bakah hian buhhum lei turin zirchianna kalpui mek a nih thu a sawi.

Agriculture and Farmers Welfare Department chuan Kolasib leh Mamit District-ah kumina leilet buh chinna hmun hactare 1280 a zau survey a neih atangin buhhum quintal 27194 thar chhuak turin a beisei a. District pahnihah hian buh chinna leilet zau (WRC cluster) 121 awmin leilet neitu 2252 awma chhut a ni a. Kum 2017-2018 ah khan Agriculture and Farmers Welfare Department chuan Special Programme for Establishment of Mini-Rice Mill chu State danga buh hralh a nih loh nan leh leilet neitute hamthatna turin a kalpui tawh a ni.