Bazaara sa leh thlai zawrh te chu bukna fumfe (kilogram) hmanga zuar turin Legal Metrology Department chuan a ti a. Thlai leh ei tur thenkhat, a bikin kan ram lei lunga thar chhuah te chu tehna fumfe awm loa hralh an ni thin a, thlai thenkhat chu a 'chheh emaw tawn in emaw' zawrh an ni mai thin a. Thil te chu buk tling an nih leh nih loh enfiah thin a ni a. Thenkhat chuan an zawm tha viau a, a tam zawkin an zawm lemlo niin a lang a ni. Zawm a hlawh tehchiam lo a nih chuan khauh taka kal zel a tul tihna a ni a; hmabak a ko hle. Bul tan tha leh ang a ni a, a endiktute an indaih loh nen duh angin hmalak a chak thei lo. Chumi piah lamah chuan kum tam tak tehfung anga lo hman tawhte chu vawi leh khata thlak thut a harsa niin a hriat a ni. Sa ah pawh a bikin a rep te chu 'tul leh fun' anga zawrh an ni thin a ni. Tehfung hman chungchangah hian ngaihdan a inang lo thei a, tuna hman tlanglawn, 'chheh, fun, tawn leh adt.' te hi hmanna tur bik nei vek an ni a, Mizo tawng hausak zia tilangtu a ni thei a. Heng thumal te hi Mizo nihphung a bet tel tlat an ni a, nuai bo ngawt chi an niloa, hman loh tawp tura tehfung danga thlak ringawt chu a fuh lohin a lang tlat a, chhawm nuna herrem a tul tawh a ni. Mizo sumdawng te hi hnamdang aiin rinawmna tlachhamah sawi an ni fo thin a, an vai chuan ni lo mahse thenkhat chuan an bungraw zawrh buk tlingloin an hralh foa, thlai zuar atanga insak bungrua thleng a huam thei awm e. Hmanni lawk khan tlawmngai pawl pakhat chuan dawr hrang hrang atangin bungrua an lei a, buk a tling lo deuh vek tih hriatchhuah a ni a, dawr hming te pawh tlangzarh an ni hial a nih kha. Eng pawh chu nise heng ang chi bungrua te chu tehfung ang khat (kilogram) hmanga buk an ni sa hrim hrima, a tlin leh tlin a ni mah zawk. Thenkhatah chuan buk tlin leh tlin loh hriat theih a ni lo a tehna fumfe a awm loa, a 'chheh' te deuh a man a tlawm hreta, a aia lian chu a an ti to leh deuh vel mai mai a ni. Sa hring chu 'kg' anga hralh a nih laiin a rep chu 'tul' anga zawrh a ni thunga, 'kg' tling anga zawrh ni mahse a repnaah kal ral a awm avangin ‘kg' (kilogram) a tling ngai loa. Mipui an phun foa, a sawt lem loh avangin buk tling loin an lei vel mai mai niin a lang. Hemi thuah hi chuan sumdawng te rinawm loh lam ai mahin remhriat tlanchham lam a kawk zawkin a lang a ni. Heng thil zawrh te hi tehna inang khata khung khawm an nih loh chuan 'sa rep' tul khat a sahrang awm zat a tlem til tial thei a, tih thleih theih loh chin a awmthei dawnin a lang a ni. Chutih rualin tawng humhalh duh ngawr ngawr vanga buk tlingloa thil hralh erawh thil dik a ni chuang hauh lo. Kan tawnga tehfung kan hman mek leh tunlaia tehna khawvelin a hman tlanglawnte hmer kawp hian, bungrua a zirin tehfung siam ni ta mai sela. Sa ah chuan a repnaa ral tur hisapin sa rep tul 1 chu 'kg' 1 buk tling ni mai sela, sa hring aia a to hret pawh nise, buk tling lo aia zawrh ai chuan awmzia a nei zawk ang. Hetiang an tho hian thlaiah pawh 'tawn, chheh leh fun' te chuan tlukpui (gram, kilogram) nei ve bawk mai sela; hun reilote chhungin mipui pawhin an pawm mai a rinawm a. Mizo te’n tehfung kan lo hman chu awmze neiin a hman zui theih anga; buk tling leh tling lo enfiah a awlsam phah theih a beisei awm.