Aizawl: Bilkhawthlir khuaa kuhva chingtute chuan tunlaia Burma atanga Mizoram kaltlanga kuhva tawlhluh karah sawrkar phalloh thil thalo a tel an ring tih sawiin sawrkarin enfiah sak se an duh hle tih Zalen palai an hrilh.

Tunhnaia Bilkhawthlir tlawhtu Zalen palai hnenah he thu hi sawiin Bilkhawthlir Kuhva Ching Cooperative Society Ltd. hruaitute chuan Burma atangin dan lovin kuhva tam tak phurh luh a ni tih sawiin a hlawkna chu vai mi hausa te chauhin an tel niin an sawi a. “Vairengte dai velah heng thil dahna tur kudam (godown) tam tak sak a ni a, hengah hian kuhva leh leichi chhekkhawl an ni a, a phurtu tur truck eng emaw zat kawngdungah an din avangin traffic pawh a jam nasa thei hle a. Police hnenah kan sawi pawhin awmzia a awm thei lo a, Assam Police ten kuhva an dan laia Mizoram Police ten an dang ve lo hi mak kan ti a, sum an chelek em ni kan ti hial a ni,” an ti.

Bilkhawthlir kuhva chingtute chuan kuhva chu dan lovin Burma atangin lak luh a ni tih sawiin sawrkarin enfiahin market control se an duh tih an sawi a. Aizawlah Burma kuhva a luh avangin an kuhva an hralh tha thei lo tih Zalen palai hrilhin Burma kuhva chu a lian zawk a, mahse an kuhva chu a tui zawk niin an sawi.

Vairengte SDO(C) office chuan Vairengte chhehvelah hian supply department kudam leh mi mal huan lo rama sak nen kudam hi a vaiin 12 a awm niin an chhinchhiah a, kudam luahtu zingah Mizo 2 awmin a dang zawng hi state pawn lam mi an ni a. Kudamah hian Champhai kaltlanga lakluh kuhva leh phai lam atanga lakluh leitha dahkhawm a ni a, kudam tam zawkah chuan heng bungruate hi a khat deuh vek niin an sawi a.

Zalen thudawn danin leithate hi sawrkar control item a ni a, contractor kaltlangin allotment bituk zat milin Mizoramah phurh luh thin a ni a; mahse, tuna a tam zawk hi chu black market atanga lokal an ni a, GST hman hma khan Taxation check gate-ah thawktuten lo enfiahin, allotment awm sa a pelh (excess) chuan an thawn let (push back) thin a. Hei vang hian leitha phur truck-te hian HN-154 (Bairabi road) an zawh thin niin an sawi. GST hnu-ah Taxation gate tihtawp a ni a, hei vang hian Vairengte kaltlangin leithate hi phurhluh thin an ni.

Ram dang atanga bungraw phur lo endiktu Excise & Custom thawktute chuan kuhva lo lutte chu chhiah an chawi tur ang chawitir an nih hnuah an kaltlangtir thin niin an sawi a. Dan anga chhiah chawite chu man an ni ngai lo nia sawiin a chawi lote erawh an mansak thin niin Zalen an hrilh.

Commerce & Industries Department thawktute chuan ramdang atanga bungraw lakluh leh thawnchhuah chu sawrkar laipui thuneihna (union list) anih avangin hmalakna an nei lo tih an sawi a. India sawrkarin Zokhawthara land custom station a neih ang chu Myanmar in a neih veloh avangin dan ang takin insumdawntawnna kalpui a harsa niin an sawi bawk. Kuhva chungchangah hian Taxation department hotute chuan Custom an paltlang tawh chuan an pawm mai thin tih an sawi a, Champhai ah waybill te siamin sum erawh an chawitir thin niin Zalen palai an hrilh bawk.

Bilkhawthlir khuaah hian kuhva ching an tam hle a, tun dinhmunah Bilkhawthlir Kuhva Ching Cooperative Society Ltd. ah member mi 330 an awm a. Kum 2016-17 ah khan kuhva nuai 380 man vel an hralh a, kum 2017-18 ah nuai 330 man vel hralhin kum kalta 2018-19 ah chuan survey neih a la ni lo a, an tharchhuah hi kum hmasa lam ai chuan a tam an beisei. Kuhva hi a tlangpuiin vai hnenah an hralh ber a, pum khat siki (Re.25) in an hralh thin a ni.