Aizawl: Sport Minister Robert Romawia Royte, Aizawl East-II Bialtu ni bawk chuan nimin khan a bial chhunga Tuithiang leh Bethlehem Vengthlang inkalpawhna lei leh Slab Culvert siam thar chu a hawng.

Lei hawnna inkhawm tawi hi Tuithiang Veng Local Council Chairman R.Lalthlamuana'n kaihruaiin PWD E.E Jenny Malsawmdawngliani’n technical report a pe a. Helai hmuna lei awmsa hi a chak tawk loh avang leh a hlui tawh avangin motor lian bungraw phur zawh theih turin PWD hmalaknain kumin March thla atang khan lei thar siam tan niin, feet 42.64-a thui, feet 16.4-a zau, feet 1.50-a chhah, M 25-a chak tura ruahman chu Rs. nuai 40 senga thawh zawh a ni. Slab Culvert hi 9.8 ft-a thui, 16.4 ft-a zau, Rs. 30 lakhs senga siam a ni. He kawng hi a bikin Aizawl chhuah lama chengte tana inkalpawhna kawng pawimawh tak a ni. Bethlehem Vengthlang Local Council Chairman Kapzauva pawhin bialtu MLA chak tak hmalakna lawmawm a tih thu a sawi bawk.

Inkhawm tawiah hian thu sawiin Minister Robert Romawia Royte chuan sawrkar hun rei lote chhunga Aizawl East-II area-a hmasawnna hna hrang hrang thawhte tar langin, heng hnathawhna tura CM duhsakna leh department-a thawktute leh bial chhung mipuite tawi-awmnaah lawmthu a sawi a. Minister chuan inthlan dawna bial hmasawnna tura manifesto a lo neihte a tahtawla tihhlawhtlin chhoh mek a ni chu lawm-awm a tih thu a sawi bawk.