Aizawl December 5, 2022: Agriculture Minister, C.Lalrinsanga MNF Adviser ni bawk chuan Israel fate Pathianin a chher dan te leh MNF kalphung chu a in ang hle niin a sawi a, Mizo hnamah hian MNF hming Pathianin chi a tuh tawh tiin a sawi. India ram mai ni lo foreign thleng thlai thar chhuah te thawn a nih theih nan 'Agriculture Product Marketing Committe Act Board' siam a nih tur thu a sawi bawk.

Mizo Hnam Runah chhung inkhawmah MNF Adviser chuan, "Pu Denga hova kalkhawmte kha, Tuipuiral atanga chanchintha meichher chhan chhuaktute ang kha an ni a, anmahni zarah MNF chuan kum 60-na hmang theiin kan awm phah. Israel fate Pathian-in a chher dan te nen he MNF kalphung hi a inang hle a, he hnamah hian MNF hmingin Pathianin chi a tuh tawh a, a la let tawh dawn lo a, MNF hi Mosia anga hnam tana meichher kengtute kan ni," a ti.

Agriculture Minister chuan, "Agriculture-a rahbi thar kan rem te hi kum thum kan kalpui leh a nih chuan hmel fai takin hmasawnna kan nei ngei ang. 'Agriculture Product Marketing Committee Act Board' kan din dawn a, kan Chief Minister hoin ruahmanna kan siam mek a, chu chuan kan thlai tharte tihral dan kan ngaihtuah dawn a, India ram mai nilo foreign thlengin hralh kan tum. Hmarcha (Mizo Chilli) pawh  matric ton 4 vel, German leh USA-ah  hralh chhuah tum mek a ni. Buh tih thatna turin OB-12 hman tan tum a ni a, OB-12-a bacteria hian buh leh thlai thatna tur tam tak a pui a, pangang, thlai eichhetu hrang hrangte hi technology hmangin kan tihlum zel dawn a, Dragon fruit-te pawh drip-technology hmangin enkawl mek a ni," a ti.

MNF Adviser chuan inthlan an hmachhawn leh turah kawng hrang hrangin tan an lak a ngai tih sawiin, "Kan hmabakah kan opponent-te hi eng ang dinhmun nge an nih tih kan hriat a tha a, Mizoramah hian Political structure-ah chuan MNF hi a lian ber a ni a, Congress hian ruhrel lian tak an la nei ve bawk a, amaherawhchu, Central-a sawrkarna an neih loh chuan thuruk lakna tur an nei lo a, rintlak an ni chuang lo," a ti.

ZPM chu Tangkawng chaw tehkhinin, "Tawh leh khawih chet hlekin an teh hek hek a, a chhan chu ruhrel nghet rintlak an neih loh vang a ni. Minister leh MLA-ah te hian eptu lam hian sawiselna tur min nei lemlo a, chutah tak chuan kan pu ber Chief Minister hi an bur bun ta ringawt a, martar-te thisena lei hi kan Pathian hian kawng laklawhah min kalsan mai dawn lo tih hi achiang em em a ni," MNF Adviser chuan a ti bawk.