Aizawl : Nimin inrinni khan Agriculture Minister C. Lalrinsanga, chuan Aprilia Scooter chhuak thar, All New Aprilia SXR-160 chu Hyve, Aizawl City Hall-ah a khuh hawng.

Khual lian C.Lalrinsanga chuan, Mizopa thluak leh duhthlan anga siam hetiang scooter chhuak thar vawiina kan khuhhawng thei hi a ropui danglam hle a, Mizo tan a chhuanawm takzet a ni. MLA ni thei tura campaign laia ka hman rim ber chu Aprilia a ni a. He scooter hi ka tan thil thar a ni lova, hetianga ka khuh hawng leh ta zel hi a ropui ka ti takzet a ni tiin lei tur zawng zawngte duhsakna hlan chungin a khuh hawng.

Joseph Lalchhanhima, Managing Director, CK Group chuan, he Aprilia chhuak thar design hi Italy-a kan hmunpui berah company-in kal tura min sawm tumin ka duh ang remkhawm an rawn duan-chhuah a ni ve a, ka chhuang ve tak meuh meuh a ni. Hetiang hun remchang min siamsak thei hi Piaggio Aprilia, Italy chungah lawmthu ka sawi a ni a ti. Khual lian C.Lalrinsanga hnenah Mizorama he scooter nei hmasa ber ni turin scooter chabi pein present a hlan nghal bawk.

Aprilia scooter chhuak thar chanchin sawi-tu Vanlalmuana, Info Bikes chuan, Aprilia hi India ramah vawiin thlenga sports scooter awmchhun a la ni reng a, tuna chhuak thar hi a hmaa mi aia lian hret Maxi Scooter a ni a. Long run atan pawh chuan nuam thei tura design niin, a body pawh a lian tawh zawk a ni. SR 160 nen engine thuhmun nimahse kawng engkimah design thar deuh vek a ni tawh a, scooter dangin a neih loh tam tak a siamtuten an bilh thar a, technology sang tak nei a ni a ti.

He Aprilia scooter thar hi Cheng nuaih 1.25 vel atangin aman a intan chho a, Kg129 a rit, petrol litre 7 leng tanky nei a ni. 160 cc niin single channel, ABS leh Alloy a thuam, 11PS@7600 rpm nei, Aprilia dang aia chuan nuam tura duan, LED headlight tha leh zual nei, khalh hahdam tura siam a ni a ti. India rama Aprilia hralh hnem ber dealer ni thei, CK Group neitupa, design tura an thlang hi Info Bikes chuan kan chhuang takzet a ni a ti.

Aprilia unveiling programme hi Pu K.Biakthianghlima, CEO, CK Group chuan kaihruaiin he scooter chhuak thar leitu hmasa pahnih hnenah chabi hlan an ni a, C.Kungpuii'n lawmthu sawina hun a hmang ve bawk.