Aizawl July 12, 2023 : South Tuipui Block Conference, Hnahthial Bazar a neiha thusawitu Lalnunmawia Chuaungo, IAS (Rtd.) chuan CAA nasa taka dodal a nih laiin MNF chuan an vote pui mai a, UCC pawh hi an dodal leh ngam lovang tih chu a hlauh ber a nih thu a sawi. 

Lalnunmawia Chuaungo IAS (Rtd) chuan," India ram zalenna sual chhuaktu leh Sakhaw tlem zawkte leh hnam tlem zawkte himna tura India Danpui duang chhuaktu chu Congress Party a ni a. BJP te hian Uniform Civil Code (UCC) min hmanpui an tum mek a. Hei hi Congress Party, Kristiante leh Sakhaw tlem zawk ten nasa takin kan dodal mek a ni. CAA pawh nasa taka kan do laiin MNF te chuan an vote pui mai. UCC pawh MNF te hian an dodal leh ngam chuang lovang tih hi ka hlauh ber a ni," a ti.

Mizoram Chief Secretary kal chhuak ta Lalnunmawia Chuaungo chuan Mizoram-ah party lian pathum a awm mek, tiin sawrkar pawh an inrin tlang vek thu a sawi a. Sakhaw humhimtu, hnam tenau zawkte chhawm dawl ṭhintu chu Congress Party an nih laiin Party dang pahnihte chu sawrkar mah se, Central lama Hindutva tuipuitu BJP zawmtu turte an ni, a ti.

Vanneihthanga Vanchhawng pawhin Congress Party a zawm chhan sawiin, "ZPM ni turah mi tam takin min ngaih laiin Congress lamah ka lut a. Kan ram leh hnam damna tura ka ngaih leh ka tuipui em em reform agenda hi ZPM-a an hotupa pakhat kan pe a. Nimahsela, tuifinriata thlak ang vang vang a ni a. Congress Party hruaitute kan pe leh a, min lo tuipui em em a, hei hi kan ram leh hnam damna tur a ni tiin a zir chianna te min neih sak a. 'Hei hi a tuipui tute in ni a, nangni hovin kan ti hlawhtling dawn lawm ni,' a tih tak avangin kan ram leh hnam siam ṭhatna tur a nih si avangin Congress Party ah kan lut ta a ni," a ti.

Congress Social media consultant Vanneihthanga Vanchhawng chuan, Sakhaw hmun pawimawh intih bawrhban sak a, intih chhiat sak hi Breaking News a tling. Kan ṭhenawm State lawkah buaina nasa tak awmin, Kristian Biak In tam tak hal a ni a. Kristian Chief Minister, Mizoram CM hian Kristiante thlavang a hauhna ṭawngkam vawikhat pawh ala chhak chhuak lova. Kan unaute thlavang a hauh duh lova, a ngawih rengna chhan hi NEDA hnuaiah BJP an zawm vang a ni a. 2018 MLA election dawnah party pakhat chuan BJP hnen aṭangin pawisa tam tham tak an dawng a nih kha. ZPM Leader hi June ni 27, 2023 khan zan khat riakin Guwahati-ah a zin a, engti turin nge a zin tih hi kan zawh chhuah a ṭul a ti.