Aizawl : Tun hnaia Union Home Minister Amit Shah-ah CAB chungchang India hmarchhak state Chief Minister mai bakah NGO leh political party hrang hrang te a koh khawm naah Mizoram Chief Minister Zoramthanga leh Home Minister Lalchamliana te an tel lo chu a hriathiam har a tih thu BJP Mizoram president J. V. Hluna chuan a sawi a, MNF Sorkar chu Mizoram himna ngaihtuah tak tak tawk lovah a puh.

Union Home ministry hian tun hnai khan Mizoram state hrang hrang hotute chu Delhi-ah kovin a hranpa theuhin an state ten CAB hman an duh danah a rawh theuh niin BJP Mizoram President J.V. Hluna chuan a sawi a, Mizoram tan chuan Sixth Schedule, The National Register of Citizens (NRC) leh Innerline Permit (ILP) te chu Citizenship Amentmend Bill (CAB) rualin hman a nih tur thu te Mizoram aiawha kal - political party, NGO (YMA, MZP leh MSU) te hnenah hian a lo hrilh niin a sawi.

Mizoram ramri veng tura Mizo hlang awmna BSF leh CRPF te din a nih tur chungchangah sawiho a nih tum hian Union Home Secretary lam pawhin an chhinchhiah thlap tiin press mi te a hrilh a, he thil a puitlin theihna atan hian state sorkar chuan bawhzui nghal se, a duh thu J.V. Hluna chuan a sawi.

BJP Mizoram president chuan, CAB chungchanga Union Home Ministry lam kohna tha taka chhangtu - YMA, MZP leh MSU te chu fakawm an tih thu a sawi a, chawp leh chilh tak chung pawha an hruaitu lu te an kal chu ropui a tiin, Amit Shah pawh hian a lo lawm hle, a ti a, kan political party tam tak te aiin NGO te hian Mizoram himna an ngaihtuah zawka a ngaih thu a sawi lang tel.