Aizawl August 30, 2022: Vawiina Chief Minister Zoramthanga hova Council of Ministers thukhawm chuan department thenkhat atanga sawrkar inrelbawlna tura thil pawimawh an thlen an ngaihtuah a, an ngaihtuah zingah Kuthnathawktute grep thar atanga wine siam leh hralh phalsak an ni ta leh Samagra zirtirtute DA 15% leh Medical allowance pek a remtih chu an thil pawm zingah a langsar. 

Meeting hian The Mizoram Liquor (Prohibition) Draft Rules, 2022 chu ngaihtuahin, zu zawrh khapna dan chu khawng taka kalpui a nih zel tur thu leh, chutihrual chuan Mizoram chhunga kuthnathawktute grep thar atanga Dan hnuaia wine siam leh hralh erawh a phalsak a ni.

Samagra Shiksha hnuaia zirtirtu mi 5000 dawn hun rei tak hlawh pung miahlo a an thawk chu an dinhmum siamthat sak nan vawiin Cabinet meeting chuan DA 15% leh Medical Allowance bakah an thawh rei dan azirin allowance pek remtih a ni.

Department hrang hranga Contract Employee te hnenah 10% Dearness Allowance pek a remti bawk.

Cabinet meeting chuan infiammi, ram chhung leh ram pawn inelnaa hlawhtlinna changte tana Mizoram Sports Incentive Cash Award Scheme 2022 phawrh chu a chhunga inkaihhruaina hrang hrangte zirho in pawm a ni.

Ramri luhkhaa Immigration check post din tura chak taka hma a lak mek naah Zokhawthar, Kawrpuichhuah leh Zorinpui Immigration Check Post-ah Mizoram Police tan post 20 siam belh an remti

Home Department hnuaia Head Constable (Operator) post 34 chu MPRO, Mizoram Police hnuaia Assistant Sub Inspector (Operator) a hlankai Cabinet meeting hian a remti bawk.

Planning & Programme Implementation Department ten Mizoram Startup Mission (Government Society) din tura rawtna a thlen chu ngaihtuah a ni a. Thalai tam tak tan eizawnna ruahman sakna tur tha tak a nih theih dan tur sawihovin, he rawtna hi pawm a ni.

India sawrkarin District Rural Development Agencies (DRDA) ti tawp tura thu a chhuah hnu in district tin a DRDA te chu District Rural Development Office (DRDO) ah leh a, Project Director (PD) 11 te chu MCS JAG level post a lakluh (encadre) tura rawtna lut chu pawm a ni.

Health & Family Welfare Department, Home Department, Finance, Revenue, UD&PA leh FCS&CA departure atanga rawtna lut te pawh pawm a ni bawk.