Aizawl July 25, 2024: Vawiin khan Chief General Manager, LPG, Indian Oil AOD, State Office DP Vidyarthy chuan Chief Minister Lalduhoma chu a office ah Gas bur thar (composite cylinder) a hlan a. Heng bur a hlan te hi cabinet Ministers te hman tur niin Chief Minister leh Supply Minister hnenah hian an hman tur bik an lo pe tawh a ni.

Chief Minister chuan hun engemaw chen hman lohva awm tawh Mualkhang Gas Bottling Plant siam tharna tur leh Oil Depot thar siamna tura an hmalakna te avangin lawmthu a lo hrilh a. Oil Depot chu Mizoram mipuiten an nghakhlel tawh a, chak takin hma la a, puih an ngaihna apianga pui turin kan inpeih reng tih a hrilh.

DP Vidyarthy chuan Mualkhanga Bottling Plant chu nitin bottle 6000 chuang thun theihna tura an thuam that tur thu a sawi a. Hei hi Mizoram nitin mamawh zat aiin a tam zawk niin a sawi. Oil Depot siamna tur hmun hi pali an thlithlai mek thu leh hun reiloteah duh an thlang fel mai tawh dawn tih sawiin a hmun a fel chuan hma pawh an lak nghal mai ang, a ti.

Gas Composite Cylinder chu a pangai aiin a zang zawk a, a himin enkawl a awlsam a, a puak thei lova (explosion proof), a tha zawk tih a sawi a. Mipuiten an Indane distributor-ah ngaihven se a duh a, company lam chu an inpeih tawh a ti a, Gas sem dan kalphung fel fai leh mipuite tana awlsam zawk tur an buaipui mek tih Chief Minister hi an hrilh.