Aizawl August 22, 2023: Vawiin chawhnu khan Dholai Police Station Conference Hall-ah Cachar leh Kolasib district-a sawrkar thuneituten ramri a ralmuanna a awm chhunzawm theih nana thawh ho dan tur relin thutkhawmna an nei. Cachar district hotute chuan Mizoram inthlanpui neih tura puih an inhuam thu an sawi.

Thutkhawmna ah hian ramri ah zin mi ten harsatna an tawh loh nan ramri a sipai leh Police duty-te chu a tul anga tih tlem hret hret a pawimawh thu te, ramri kan a ruihhlo leh dan lova ramsa tawlh awm thin veng tur a thawhho dan tur te, ramri a State pahnih Forest Department mi leh sa ten hmalak an tum apiangin harsatna a thlen loh nan inhrilhhriat hmasak thin a pawimawh thu te sawi a ni a. 

Mizoram ah MLA inthlanpui nei tur a inbuatsaihna kal mek ah Cachar district thuneitute chuan a tul apiang a puih an inpeih reng thu an sawi a. Tun hnai ah Assam registration number nei Alto motor thahnem tak Kolasib paltlang a Mizoram lo lut an awm thin chu uluk zawk a thlithlai a pawimawh thu sawi a ni bawk.

Vawiin thutkhawm ah hian Cachar district aiawhin, Rohan Kumar Jha, IAS, Deputy Commissioner, Cachar district ; Numal Mahatta, SP, Cachar ; DFO, Addl. SP Cachar-te an tel a. Kolasib District aiawhin John LT Sanga, Deputy Commissioner, Kolasib ;  Lalrinawma Traite, SP ; Margaret Lalramchhani, DFO ; Cheemala Shiva Gopal Reddy, SDO (C) ; Lalremruata Sailo, SDO (C), Vairengte leh Hmingthanzuala, DIPRO, Kolasib te an tel a ni.