September 12, 2022; Central YMA in ruihhlo dotu tur 'Central Anti Drugs Squad' (CADS) a din hnuah, ruihhlo a tawmim tan nghal nia thudawn a ni a, hetihlai hian kumin January atanga September ni 9 thleng khan Mizoramah ruihhlo vanga thi mi 26 an awm.

Kumin September - October chhunga CADS convener atana ruat, CYMA finance secretary ni bawk, Roneihthanga'n ZALEN a hrilh danin, September ni 9, 2022 a CADS member lak luh an nih zan atangin hmalakna an kalpui tan nghal a, hma an lak tawh chin ni 2 emaw chhung lek atang pawhin, a bikin Aizawl ah ruihhlo a hluar hle tih an hmuh thu te, ruihhlo ti thar an tam thu te leh lian tham deuh tak a ruihhlo zuar te an luhchhuah nghal mek thu te a sawi.  

"Tun hma lama kan lo hriat tawh ruihhlo ti thin te kan la hmuh rualin, ti thar an tam hle a, tun hma a heroin Rs. 2,500-3,000 man vel ni thin pawh tunah chuan Rs. 700 man bawr vel chauh a ni, tlem in tunah hian a man a to chho leh tan niin kan hria," Roneihthanga chuan tiin, "Dan hnuaiah zel felfai taka thil tih zel kan tum a, kan mi mante pawh Synod Social Front te nen tangkawpin counselling neihpui zel kan tum," a ti bawk.

CADS in Aizawl a ruihhlo do beihpui an thlakna ni 2 emaw chauh la nimahse, ZALEN in ruihhlo ti leh zuar thenkhat a biakte chuan CADS hmalak hnuah ruihhlo a tawmim nghal a, a man (rate) la ngai deuh reng mahse, a vang tan nghal a, a zuarte pawh an fimkhur zual a, hmuh tur pawh a vang tan nghal niin an sawi. 

Hetihlai hian Excise & Narcotics department chhinchhiah danin, kum January atanga September ni 9 thleng khan ruihhlo (heroin) vanga thi mi 26 an awm tawh a, chung zinga mi 24 te chu mipa niin, midang 2 te chu hmeichhia an ni.