Comptroller and Auditor General of India in audit report a siam thar ber chu Mizoram Assembly House hnuhnung ber khan pharh a ni tawh a. He report hi kum tin tih chhuah niin mi tam takin an ngaihven a, chanchinbumi te phei chuan sawrkar hnathawh dan enletna a nih avangin a changin an chang thin a ni. CAG Report hian kum 5 a huam thin a, department audit tur te chu State Audit Advisory Board in thawhkhawmin chumi hnuah Public Accounts Committee chuan approval a lo pe leh thin a ni. Tunah hian departmenr 10 chuang chu nakum audit tura buatsaih mek an ni. CAG report ah hian department leh sawrkar office dang te chu an pawisa hman dan tarlan a ni thin a, pawisa hman diklohna a awm thei em? tih te, tun aia pawisa renchem dan a awm em? tih leh thil dang dang tarlan a ni thin a. Department te hnathawh langtlang taka tarlanna a ni deuh ber a, sawrkar darthlalang pawi mawh tak a ni. CAG report hi a pawimawh ang huin kan la ngai pawimawh lo hle a, tuna a lan danah chuan report te chu House-ah a hminga pharh a ni a, chanchinbu lamin chanchinthar siam nan an hmang a, ‘action’ lak a awm lem lova, a liam leh mai thin a ni. Hmanni deuh khan Home department in a lo thlawna pawisa a hman dan CAG report tlawhchhan hian chanchinbu lamah tarlan a ni a, Environment and Forest hmanlaknaa Tam dil cheibawlnaa thil felhlel awm te pawh ziah lan a ni tawh a, heng lo pawh hi thil felhlel tam tak tarchhuah tur a la awm a ni. CAG report hian inhekna leh intihmualphona lam a kawk loa, mahni department kaldik lohna lai hi chhung lam atanga hriatfiah a har chang a awm thin a, CAG in audit fel tak a tichhuah atang hian staff te hnathawh dan te chu chipchiar zawkin a enlet theih a. He report tlawhchhan hian sawrkar hruaitu leh officer lian te chuan an mahni department chan theuha tih dik ngai awm te chu an siam tha zawk tur a ni. Hetiang anga hmalakna hi nasa zawkin uar ila sawrkar inrelbawlna pawhin hma a sawn dawrh anga, sawrkar chak kan neih theih a beiseiawm. CAG report hi kan thengin thawnga a luh loh vang chu ‘action’ lak a awm loh thin vang a ni a, politician leh sawrkara thuneitute pawhin an ngaih pawimawh a hun ta hle mai. CAC report hi court-ah pawh dintlang pui tlak a ni a, thubuai awrh theihna a ni hial a. Sawrkar lamin hmalak a tum lo a nih chuan tlawmngai pawl/civil society lam hian court-ah te han thlen rap rap sela ngaih pawimawhna chang kan hre deuh mahna.