ZALEN Feb. 4, 2025; Kum 2023 chhungin Cancer Hospital Zemabawka Cancer natna vei thar in-register mi 2,100 chuang an awm.

Vawiin February ni 4, 2025 (11:00 AM) khan National Health Mission hnuaia Programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan khawvel puma Cancer dona ni "World Cancer Day 2025" chu Taxation Department Auditorium, MINECO-ah hmangin he hun hi Dr.Vanlalsawma, Principal Director, H&FW Department chuan Khuallian niin a hmanpui.

Vawiina World Cancer Day pual inkhawm hi Dr.Eric Zomawia, Mission Director NHM State NHM-in a kaihruai a. Chairman hian kalkhawmte lawmna thu sawia hun a hman zawh hnu-ah kumin World Cancer Day thupui "United by Unique" hmangin Dr.Zirsangliana Chhangte, Gynecologist Oncologist. MSCI Zemabawk chuan zirtirna a pe a. Cancer natna laka kan tawnhriat theuhte hi danglam theuh mah se, hei hi pumkhata min siamtu-ah kan hman thiam a pawimawh a, thupuiin thil tum pawimawh tak tak pathum a neih, damlote chi-aina laka thlamuan, tanpui an ngaihna laia chhawmdawl, damlote fuih phur chunga enkawlna pek pawimawhnate a tarlang a. Tin, Cancer natna lan chhuah dan leh hriat chhuah ran a thatna te, a vei loh tura nun phung hrisel kan zir a tulna te a sawi lang bawk.

Dr.Jeremy L.Pautu, Director, MSCI, Zemabawk chuan Mizoram State Cancer Institute report pe in Mizoramah hian Cancer enkawlna Cobalt Therapy chu 4th February 1998 khan neih tan a nih thu te, khawl thar mamawhna a sana vanga TCCC khawl thar pawh 4th February 2024 a neih a nih dante a tar lang a. Dr.Jeremy hian “Bul tan tirh laite ngaihtuah chuan nasa takin Mizoram pawhin cancer enkawl kawngah hma a sawn nasa hle tawh a, cancer case thar hi a ni tela a pun chhoh zel avangin MSCI pawh thuam changtlun chhoh mek zel a ni” a ti. Tin, Japan international Cooperation Agency (JICA) te nen Rs.732 Crore senga MSCI pawh thuam a nih thute tarlangin hei hian nakinah chuan nasa takin Cancer enkawlna leh research neih kawngah min pui hle dawn niin a tarlang tel bawk.

He huna thusawitu Khuallian Dr. Vanlalsawma Principal Director, H&FW chuan, "Cancer hian mihring a khawih dan hi a inang lo a. Hei tak hi a enkawltu leh damlo chenpui te hian kan hriat thiam a tul thin. Cancer damlote hi mi bik an ni a, hriatthiamna thuk tak nen duat taka kan enkawl a tul a. Hemi kawngah hian thawktute pawh nasa leh zual tan la turin kan inngen a ni.” a ti.

World Cancer Day hi khawvel pumah kum 2000 atang khan hman tan a ni a. Mizoramah erawh kum 2014 atang khan hman a ni thung. He Programme kalpuitu NPCDCS hi Mizoram chhungah Population Based Screening kalpui mek a ni. Mizoram State Cancer Institute-in a tarlan danin kum 2023 chhung khan Cancer Hospital Zemabawka Cancer natna vei in register mipa leh hmeichhe belh khawm hi 2,100 an chuang tawh a ni.

Vawiina Cancer day pual hun hi Dr. Catherine Lalmuanawmi State Nodal Officer, NP-NCD chuan lawmthu sawiin hun hnung a khar a ni.