Aizawl January 24, 2024: New Delhi a cham mek Commerce and Industries Minister F. Rodingliana chuan Bangladesh High Commissioner Md. Mustafizur Rahman chu Bangladesh Embassy, New Delhi ah a hmu a, Mizoram leh Bangladesh insumdawn tawnna chungchang a sawipui.

Commerce & Industries Minister F. Rodingliana hian Bangladesh High Commissioner hnenah hian kum 2022-a Mizoram leh Bangladesh insumdawn tawnna tur inremna ziah tawh, infrastructure mumal buatsaih anih loh avangin tun thlenga insumdawn tawnna mumal zawk a la kalpui theihloh thu a hrilh a. Inkalpawhna tha - khawmual leh lui tui chunga siam chu pawimawh hmasa a tih thu a hrilh, Mizoram lam chuan sawrkar tharah inkalpawhna kawng siam tur hian hma an lak mek thu sawiin, Bangladesh lam pawhin he ruahmanna milpui a hma an lak ve a duh thu Md Mustafizur Rahman hnenah hian a thlen a ni.

Bangladesh High Commissioner hian Minister thusawi hi a tawmpui thu sawiin, Mizoram leh Bangladesh insumdawn tawnna tura ruahmanna awmsa te tihlawhtling turin Central Sawrkar a Ministry of External Affairs lam an pawimawh thu a sawi a, nawr tlan a pawimawh thu Minister hi a lo hrilh a. Mizoram thlai tharchhuah zing-ah Sawhthing leh Aieng te chu Bangladesh-ah mamawhna a sang hle a ni tih hrilhin, Mizoram leh Bangladesh inkalpawhna hi hmun chhengchhia leh remlo lai a nih thin avangin hmalak a har thin a, technology lthang zelah tunah chuan thil harsa a awm tawh lova, tihpuitlin thuai a beisei thu sawiin a theih anga Bangladesh lamah pawh hma a lo lak tur thu Minister hi a lo hrilh a ni.

Md. Mustafizur Rahman, Bangladesh High Commissioner hi Mizoram lo zin a chak thu a hrilh a, Maro-a hian Chapchar Kut hmang turin a sawm nghal a ni.