Cannes Film Festival neih mekah hmeichhe pakhat chu red carpet-ah tlan lutin a thawmhnaw hak a phel a, 'pawngsualna thleng mek hi titawp rawh u' tiin a au zui. Henu hi tunge a nih tarlan a ni lo a, a taksaah hian 'stop raping us' tih Ukraine flag rawngin a ziak a ni. 

Red carpet-ah hian thla latute sir atangin a lut a, a thawmhnaw hak chu pawt thlain kekawrte nen chauh milarte leh thlalatute hmaah chuan Russia sipai ten Ukraine hmeichhiate an pawngsual thin chu a duh loh thu leh titawp tura a duh thu a au chhuahpui ta a ni. Hemi chungchangah hian Ukraine thuneihtu lam chuan thuchhuah an la siam lo a, Russia sipai ten an ram mite an pawngsual chungchang erawh an chhui mek thu an tarlang. 

Film festival lian leh ngaihven hlawh tak mai Cannes Film Festival hi May 17 atang khan Cannes, France-ah neih a ni a, May 28, 2022 hian a tiak ang. He hunah hian Bollywood star pawh thahnem tak an inlan a, Deepika Padukone, Abhishek Bachchan, AR Rehman, Prasoon Joshi, Mame Khan leh Shekhar Kapoor te chu a langsar zual an ni.