Inter Milan midfielder Cesare Casadei, kum 19 mi chu Premier League khel turin Chelsea-in euro maktaduai 15 bakah, add-ons euro maktaduai 5-in an la lut niin khawthlang media ten an sawi.

Italian footballer chungchangah hian Chelsea leh Inter Milan te hian tihfel ngai tlem an la nei a, an tihfel rualin Casadei pawh Chelsea player niin kawr pawl a ha ve thei tawh dawn a ni. Casadei hian England panin medical a nei thuaiin a rinawm. 

Inter Milan academy chhuak Casadei hi Inter Milan senior team-ah khel phak rih lo mah se amahah beiseina sang tak neiin Chelsea lam hian enkawl an huam a, tun season hian an chhawr nghal dawn em tih erawh a la chiang rih lo. 

Tun transfer window chhunga inseng hnem ber Chelsea hian Marc Cucurella, Raheem Sterling leh Kalidou Koulibaly bakah player dang lakluh nan pound maktaduai 176.5 zet an seng tawh bawk a ni.