Aizawl November 5, 2022: ZPM General Secretary (Vigilance) SL Ngursailova Sailo chuan, Central-a sum sawichhuak thei ram hruaitu neih aiin state chhung atang ngeia thawkchhuak thei ram hruaitu ramin a mamawh niin a sawi. Kan state thawhchhuah chu kan budget atanga 10% pawh a la tling lo tiin, state thawhchhuah (own revenue) hi nasa taka tihpun a ngai thu leh tih theih a nih loh chuan sawrkar rethei kan ni reng dawn, a ti. 

ZPM chhung inkhawma thu a sawinaah SL Ngursailova Sailo chuan, “Eirukna hi a tak taka kan do a ngai; terrorist-ho chuan kawngpui te an tichhia a, Lei te an tichhia a, building te an tichhia a. Eiruk chingho chuan hmasawnna hna thawhna tur sum an eiru a, hmasawnna an tithuanawp a, terrorist ho aiin ram an tichhe nasain a rapthlak zawk. Eirute hian CBI emaw, ACB emaw aia an hlauh tur ram hruaitu, mi huaisen leh mi dik kan mamawh a ni; anni aia kan mamawh chu a taka eirukna do ngam ram hruaitu a ni,” a ti bawk.

ZPM GS chuan, PMGSY sum hmanga Khawzawl to Ngaizawl kawng 12.49 kms siam tur kha estimated cost Rs. Nuai 820.33 chungchang sawiin, ZPM Vigilance chuan an legal department nen tangkawpin lokayukta-ah complaint an thehlut tih a sawi. Investigation ti turin ACB kutah dah a nih thu leh November 1, 2022 khan Addl SP, ACB hmaah statement an pe tih, ZPM Gen. Secretary chuan a sawi. He kawng siam hna hi November 13, 2017 atanga chhiarin November 13, 2019 chhunga zawh tura tih a ni, tiin Contractor leh he hna hnathawktute atangin Speaker Lalrinliana Sailo chu pawisa dawngah a puh a, thiamloh chantir ngei tur niin a sawi. 

SL Ngursailova chuan, “Education department-in NABARD XXIV-ah Rs. Nuai 2,250 an puk a; NABARD XXV-ah Rs. Nuai 900 an puk a; NABARD XXVI-ah Rs. Nuai 1,134 an puk bawk a. Kum 2020-2022 chhung ringawt hian Rs. Nuai 40,000 an puk a ni. Heng an sum puk te hi a pung awm vek a ni a, an hman dan a theih ang angin a hmunah kalin kan enfiah a, rilru tina em emtu chu contract amount atanga 30% leh a hnuai lam deuh veka hnathawh a ni hi a ni. Zaa sawmsarih (70%) lai contractor-te chan a ni hi mak kan ti a, heti taka thawk tha lo ten a hlawkna an tel hi kan duh lo takzet a ni,” a ti bawk.

ZPM GS chuan, “SEDP hi kei chuan Mipui Bumna Programme tia a hming hi vuah mai ka duh tawh. Mipuite hnenah chuti zat chu budget-ah kan dah tiin an sawi thin a, budget-a an dah, intithei taka an sawi thin chu Vbc 2,175 a ni a, mahse a taka hman tur an neih zat chu Vbc 949.34 chauh a ni. Budget-ah kan dah an tih atanga an sum hman tur neih chu 43.64% chauh a ni. Law department, SEDP kaihhnawih lovah Vbc 32.58 dah a ni a, he department-a dah chauh pawh hi Nuai 3-in sem se chhungkaw 1,086-in an chang thei ang. PWD-ah Vbc 247.42 an dah bakah kawng siam nan Vbc 150 an la dah leh bawk. Sports-ah Vbc. 18 an dah laiin buhfaia intodelh tura CM-in a sawi Agriculture department-ah Vbc 6.28 chauh zu dah a maw le! Buhfai tharchhuahah kan intodelh dawn lo lutuk tih hi zawlnei nih kher ngai lovin ka sawi ngam,” a ti bawk.

Ngursailova chuan, “Congress sawrkarah khan NLUP atan Rs. Vbc 2,800 an sen laiin Rs. Vbc 1,300 khan beneficiary te hnen a thleng a, chumi awmzia chu NLUP sum 46.42% kha mipuiin an lo dawng ve tihna a ni. MNF sawrkarah hi chuan 15% pawhin beneficiary-te hnen a thleng lo. MNF sawrkar sum hmanna tur ruahmante hi en chiang ila, kan state thawhchhuah (own revenue) tipung thei tur a awm mang lo. Kum 2018 inthlan dawna an policy tihchhuahah khan ‘Mizoram sawrkar hnathawkte GPF withdraw dan fel zawk siam leh TA ngaih pawimawh’ an tum thu tarlan a ni a. Tunah erawh GPF lakchhuah har lutuk hi sawrkar hnathawkte an buai phah hle, sawrkarin pension-a chhuak te GPF leh thildang a batsak a la pek loh hi mi 1,367 an ni a, chungho sum la pek theih loh tlingkhawm chu Rs. Vbc 249.87 zet a ni,” a ti bawk.