January 4, 2024; CM Lalduhoma'n, "Sawrkar laipuiin Myanmar nena kan inrina hung a tum a nih chuan tha kan ti thei lova, kan pawm thei dawn lo," a ti. 

CM hian nimin (3.1.24) tlai khan External Affairs Minister of India, Dr. S. Jaishankar chu Delhi a a pisaah a kawm a. Mizorama Myanmar Refugee awm mekte chungchang leh thil pawimawh dangte an sawi dun.

Tuna India leh Myanmar ramri kan hman mek, British sawrkarin a siam hi keini Mizo hnahthlakte tan chuan barhluih ramri a ni a, unau min then hrang a, hmasang ata tawha kan hnam leh kan ram min tidarh a. Chuvang chuan he ramri hi kan pawm thei lo tiin zofaten pawm harsa an tih thu External Affairs Minister hi a hrilh a. Hnam khat kan nih avangin rorelna pakhat hnuaia awm theih ni se tih hi kan duh dan leh thlir reng a ni tih a hrilh bawk. 

"Sawrkar laipuiin Myanmar nena kan inrina hi hung a tum a nih chuan British sawrkarin min barh luih zofate thendarhtu ramri hi a pawm tihna a ni dawn a, chu chu keini chuan tha kan ti thei lova, kan pawm thei dawn lo a ni tihte a hrilh bawk.