Aizawl : Zirtawpni khan sawrkar laipui, Government of India, Ministry of Health & Family Welfare (Deptt. of Health & Family Welfare) chuan central sawrkar hnuaia MBBS zirtur central pool quota-a state te seat neih zat tur a tichhuak a, Mizoram chuan seat khatmah a chang lo a, BDS-ah seat pali pek a ni. Hetih lai hian Mizoram sawrkar chuan thuchhuah siamin central in MBBS quota a tihtawp chhan chu State in ama puala Medical College a neih vang a ni, an ti.

Mizoram hian MBBS bikah hian seat khatmah chan a neih loh laiin medical college nei ve tho Meghalaya chuan seat 50 central pool quota atang hian an chang a, BDS seat thum pek an ni bawk. Central enkawlna hnuaia awm medical college awmna Nagaland pawh MBBS seat hi 40 pek an ni a, BDS seat hi pathum an la chang zui bawk.

Higher & Technical Education Department thuchhuah chuan, "Central Sorkar chuan Ministry of Health & Family Welfare kaltlangin Zoram Medical College (ZMC) din nan sum tam tak a rawn pe a, Mizoram-in Medical College a nei ve ta a. Nikum lamah ZMC-ah Mizoram chu seat 100 admission pek a ni a, kuminah pawh seat 100 bawk pek leh a ni leh dawn.

Heng avang hian dan angin Mizoram State chuan Central Pool Quota MBBS dawng tur a ni tawh lova, Central Sorkar hmuhdanah chuan mahni kea ding thei leh puitling tawh ang a lo ni ta a, hei hi sorkar lam atang chuan thil lawmawm tak a ni zawk a ni," tiin an tarlang zui bawk.

North-east a state te ber Sikkim chuan MBBS seat hi pali an chang a, BDS seat hi pathum pek an ni bawk. MBBS seat chang lo zingah hian Mizoram bakah Arunachal Pradesh leh Tripura te an tel a, BDS seat thum ve ve an chang.