Khawvela natna tihbaiawm bera mi tam takin an chhal, tihdamna awm lo HIV/AIDS chuan kan ramah pawh a mikhual ta lo hle a. Kum 1990 vel atangin Mizoramah kan hmelhriat chauh a ni nain tunah chuan kan chhungkua anih em loh pawhin kan kawtkai a rawn thleng ta der mai.

AIDS lama thawktu Mizoram State AIDS Control Society (MSACS) report atanga a landan in Mizorama AIDS vei hriat tirh a nih atangin AIDS vanga thi chu 2000 bawr vel an ni a. India ram pum a HIV hrik pai zat chuan tlem lam a pan hret hret laiin Mizoram chuan kum tin pung zelin, 2017 a National AIDS Control Organization (NACO) zirchianna ah chuan India ram pumah mi 100 zelah HIV hrik pai zat 0.22% a nih laiin Mizoramah chuan 2.04% a ni a. Mizoram hi India state dang te nen khaikhin in a sang fal hle a, Mizoram dawtah Manipur (1.43%) leh Nagaland (1.15%) an awm a. Heng state te hi Mizoram ang lovin kum tin hniam lam pan zel thung a ni. Aizawlah nitin HIV hrik pai mi 7 hmuhchhuah thar belh zel ang nia chhut a ni bawk.

Mizoram chhunga district hospital hrang hrang thawktu te pawhin an district chhungah HIV a hluar thu an sawi zel a. Tunhma lama inkaichhawnna langsar ber thin damdawiin ti thin te avanga inkaichhawnna 'hriau inhmantawm' ni tawh lovin tunah chuan mipat hmeichhiatna (sex) chu inkaichhawnna langsar ber a ni ta a. Chumai ni lovin he natna hi thalai zingah a kai thar an tam ber bawk a, kan hma hun hi a thim hle a tih theih awm e.

Hetiang hi kan dinhmun anih avangin a do kawngah tha thlah lova tih tak zeta kan tan tlan a ngai ta hle. Health Minister Dr. R.Lalthangliana pawhin theihtawp chhuaha do a tul ani tih hriain chak zawk leh awmze nei zawka do anih theihnan Kohhran leh tlawmngai pawlte thawhpuiah a sawm ta hial a. Health Minister hmalakna hi a ropui a, theihtawpa sawrkar, kohhran leh tlawmngai pawl ten hma an lak chuan awmzia nei ngei ang.