August 23, 2023; Central YMA chuan Sairang Zero Point bul a Railway Lei dawh chim chhan chhui chhuak a, a mawhphurtu hrem an nih ngei theih nan a hmala turin Mizoram sawrkar leh Railway thuneitute an ngen.

Thuchhuah an siamah Central YMA chuan lei dawh mek chim avanga chhiatna rapthlak tak thleng chu pawi a ti takzet a, boral ta chhungte a tawrhpui takzet thu leh hliam tuarte pawh an dam leh vat theih nan duhsakna sang ber a hlan.

He chhiatna thlen chhan dik tak chhui chhuak a, a mawhphurtu hrem an nih ngei theih nan leh an siam tawh chin pawh mipui tan a him leh him loh enfiah kawnga hmala turin Central YMA chuan Mizoram sawrkar leh Railways thuneitute a ngen a, nunna chan leh hliam tuarte zangnadawmna pe ngei turin Contractor, ABCI BBJ Joint Venture, Silchar te a beisei bawk.