Aizawl : ZPM chuan April 19, 2022 khan Working President  K. Sapdanga hovin Aizawl Civil Hospital (CH(A) -a CT khawl thar bun (installation) hna thawh dan a hmunah kalin an enfiah  leh a, CH(A) CT Scan dinhmun vawi thum an enfiahna a ni. April thla chhung hi sawrkar ngaihchan kan tum a ni. Hemi chhunga installation tih a la nih loh fo chuan tun aia chak leh na zawka sawrkar nawr an tum tih an sawi.

Thla ruk (6) zet Aizawl Civil Hospital-ah CT Scan hman theih a ni ta lo chu mi harsa leh rethei zawkten an tawrh nasat thu ZPM Working President chuan sawiin, “CT Scan pawimawh zia hretu chu doctor-te mai bakah a hmangtu dam lo rethei tak tak te kan ni a, nitin zantin emergency-a en ngai hi an awm reng a ni. Record-a kan hmuh dan chuan thla khatah mi zathum (300) te en a ngai a, zantin mi pahnih (2) vel tal emergency-a en a ngai a, CT Scan-a en phawt loh chuan emergency-a en ngai a nih leh nih loh pawh hriat loh te an ni. Khawl hman lai hi November, 2021-ah a chhia a, chuti chung chuan October 2021-a khawl thar chah thlen chu tun thlengin hman lohin a la awm mai mai a ni,” a ti.

ZPM-in CT Scan dinhmun a enzui reng thu pawh sawiin K. Sapdanga chuan, “March ni 22, 2022 khan Dr. Vanlalthlana, MLA hovin kan party Vigilance leh Media & Publicity Department ten a hmunah kalin thil awmdan an lo enfiah tawh a. Hei mai hi duhtawk lovin, karkhat hnu March ni 30, 2022 khan CT Scan khawl dinhmun leh sawrkarin engtiangin nge hma a lak zel dan an lo enfiah tawh bawk a. A vawi thum nan vawiin April 19, 2022-ah hian kan kal leh a, vawiin thleng pawhin installation an la ti lo fo a, engtika tih tur nge tih pawh hriat a ni lo. Chuvangin, ZPM chuan April thla chhung ngei hian he khawl, thla ruk (6) lai hman nghak tawh hi sawrkar hian bun (install) fel ngei se kan duh a, April thla chhung hi sawrkar ngaihchan kan tum a ni. Hemi chhunga installation tih a la nih loh fo chuan tun aia chak leh na zawka sawrkar nawr kan tum tih ka sawi duh a ni,” a ti.

Sapa chuan mipui mamawh lian tak, nunna leh thihna hril thei, mi rethei leh harsa zawk ten kan ban phak Civil Hospital-ah ber kher hun rei tak dam lo inenkawlna khawl pawimawh hman theihloha awm chu ZPM-in  pawi a tih thu sawiin, “Nikum 2021 lam daiha chhe tawh, vawiin thlenga hman theih tura sawrkarin a peih fel thei lo hi a mak kan ti a. Kan sawrkar hrawn mek hi a duhna lama an tuan a that tehlul nen, mipui hriselna dinhmun enfiahna khawl CT Scan hman theih tura siam kawnga an tha a thum rei ta mah mah hi ZPM chuan a hrethiam lo hle a ni. Nikuma khawl thar lei tun thlenga la hman theih loh hi chu technical problem aiin ngaihsak loh vang (negligence) a ang zawk. Kan sawrkar hotute atangin tumna tak tak (political will) a awm lo niin a lang a, awm se chuan CT Scan hi bun (install) fel a hun tawh hle a ni,” a ti bawk.