Aizawl January 17, 2023: NABARD( RIDF-XXIV) sum Cheng nuai 528.92 hmanga Rural Development Department hmalakna,  Springshed Development & Water Supply for Chalfilh Catchment Area chu vawiin khan Rural Development Minister Lalruatkima'n Khanpui ah a hawng a,  thing leh mau ti chereu lo zawnga theihtawp chhhuah chu tih makmawh a nih thu a sawi.

Khanpui Bazar shed-a hawnna neihah Lalruatkima chuan Covid hripui avangin khawvel pumin hun khirh leh harsa tak a tawh hnua 2023 kum thar chuangkai a ni chu lawmawm tiin chhungkua leh mimal tan malsawmna thlen turin mipuite duhsakna a hlan a. Ruatkima chuan, "Mizote hi pi leh pute atanga tuikang nghak thin kan ni a, chutiang hun hrehawm leh harsatna te chu hmasawnna in a her liampui tawh a ni. Ramin hma a sawn rualin kan chenna leilung leh boruakin chhiat lam a pan a, tuihna te a lo tlem tial tial thung a. Kan ramngaw te leh tuihna te siam thar leh turin khawvel ram lian te leh India sawrkar ngei pawhin nasa takin hma a la. Heng avang hian thing leh mau ti chereu lo zawnga theihtawp chhhuah hi kan tih makmawh a ni," a ti.

Minister chuan van ruahtui dawn khawl nachang hriat a pawimawh thu leh  tui lakna leh dawn khawlna atana sawrkar hmalakna te mipuiin neitu rilru pua duat taka enkawl thiam a pawimawh thu sawiin, "Tui kan hnianghnar chuan faina leh thianghlimna kawngah te, hriselna kawngah te nasa takin hma kan sawn thei dawn a. Sawrkarin mipuite hnena tui thianghlim pek hi a mawhphurhna a ni a, chumi rualin tui lakna hmunhma leh hmanrua te engtik lai pawhin sawrkarin a vil reng thei lo va, a khaw neitu mipui ten hemi kawngah hian mawh an phur a ni," tiin Khanpui leh Lailak khaw mipuite chu neitu rilru pu chunga RD hmalakna te lo vil zui zel turin a chah.

Ruatkima chuan Rural Development Department-in thingtlang mipuite hmasawnna tura kawng hrang hranga hma a lak dan tarlangin, "RD hnuaia scheme - Ni 100 inhlawhna MGNREGS te, PMKSY te, MzSRLM, PMAY(G), SPMRM etc. te hmangin thingtlang mipuite hmasawnna tur leh eizawnna tur siamsak te chu thingtlang mipui ten an chhawr tangkaiin a takin hma an sawnpui nasa hle a ni. Heng scheme-ah hian mipuite tawiawmna tha avang leh Department hotute thahnemngaihna avangin Mizoram chuan state dangte aiin hma a la tha," a ti. 

Minister chuan, "Sawrkar hi mipui tawiawmna tel lovin a kal thei lo va,  mipuite pawhin sawrkar hi ka ta a ni tih rilru pu in sawrkarin mipui hmasawnna tura hma a lakna ah tawiawm ila. Covid harsatna karah sawrkar, kohhran leh mipui te tanrualna avangin hripui lakah Mizoramin tun hun a thlen theih phah hi a lawmawm ka ti tak zet a ni," a ti bawk.

Springshed Development & Water Supply for Chalfilh Catchment Area project hi kum 2017 ah NABARD ah thehluh a ni a, kum 3 hnu ah kum 2020 khan NABARD in a pawmpui a, ni 10.2.2020 ah thawh tan niin ni 16.10.2021 ah zawh a ni a.  He project hi tui lakna tur ringawt tinzawna duan a ni lo a, Chalfilh tlang leh a chhehvel ramngaw chereu zel tur veng a, tuihna tuaithar leh tihpun lehna tur atana ruahman a ni.  

Chalfilh Catchment Area chhunga khaw 3 - Hmunnghak, Lailak leh Khanpui khua te chawmna turin Chalfilh tlang sang atangin GI Pipe hmanga tui lak a ni a.  Tui litre 6000 dawng theuh Zonal tank 10, Khanpui-ah 5, Lailak-ah 3 leh Hmunnghak-ah 2 dah a ni a. Tui khawlna tur zem lian litre nuai 3 dawng theuh, Khanpui-ah 2, Lailak leh Hmunnghak-ah 1 ve ve bakah Lailak-ah bik litre nuai 2 dawng pakhat dah a ni bawk.