Aizawl July 24, 2023 : Deputy Chief Minister Tawnluia chuan vawiin khan Chanmari leh Chanmari West inrina bul, Hunthar Road atanga pengchho, cheng nuai 30 senga siam “Ramlai Road” chu a hawng.

Tawnluia chuan Ramlai Road chu a bultanna an hawn chu  tihchangtlun zelna tur pawh ngaihtuah a nih tur thu a sawi a, Chaltlang Dingdi veng thleng a tlang chhoh theih nan kawng kan zawng zel ang a ti. Deputy Chief Minister chuan mipuite chhawr tangkai tur leh hmasawnna tur hi kan ngaih pawimawh ber a ni reng a, thil tha hi chu inngaihhlutpui thin a pawimawh a, mipuite pawhin mahni ta a ni tih hria a dimdawi leh uluk taka hmang tangkai turin a chah a, Chanmari leh Chanmari West khawtlang mipuite chungah a bik takin PHE tui pipe lian an phum chungchanga an dawhtheihna leh hriatthiamna, an inphalna avangin lawmthu a sawi bawk a ni.

Ramlai Road hi tunhma chuan two-wheeler chiah a tlan thei a, kawng thar siamna atan hian H. Sanga, Chanmari ram chu cheng nuai 120 a lei niin kawng hi lirthei ke li tlan theiin tih zau a ni ta a ni. UD&PA department hnuaiah hna thawh niin a project hming hi “Improvement of Ramlai Road at Chanmari, Aizawl” tih a ni. Ramlai road hi Chanmari leh Chanmari West inrinaah awmin chhungkaw 90 velin an chhawr tangkai thei dawn a ni.