Aizawl: Union Finance Minister Nirmala Sitharaman hovin Zirtawpni khan State Finance Minister ten Pre-Budget (2023-24) Meeting Manekshaw Centre, New Delhi ah an nei a, he huna Mizoram aiawha tel Taxation Minister Lalchamliana chuan Special Assistance to States for Capital Investment (SASCI) chu hmasawnna hnathawh nan a tangkai hle tih sawiin kum 2023-24 ah pawn chhunzawm zel ni se tiin a rawt.

Meeting ah hian Taxation Minister Lalchamliana chuan Revenue Expenditure a deficit nei state te tan Special Assistance to States for Revenue Expenditure (SASRE) chu SASCI ang zulzuiin kum 50 hnua rulh tur interest free loan siam ve nise a ti a. SASCI guideline-a PMGSY leh JJM-ah te State Matching Share (SMS) phal a ni chuan state te chhawk hle tih sawiin SASRE siam a rem chiah loh pawhin SASCI atangin External Aided Project-ah te Counterpart funding phal ni se. Special Category state ho tan hian Central leh State sharing pattern tun hnaia thlak a nih hnu hian state tum tur hi a lian ta a, hei hi phal a nih chuan hmasawnna atâna hmalakna ah a chhawk zangkhai dawn niin a sawi.

Lalchamliana chuan State dangte pawhin an rawt angin sum pek theih zat 3.5% of GSDP tuna phalsak ang zat tal chu chhunzawm ni se a ti a. 15th Finance Commission ruahmanna anga kum tina Post Devolution Revenue Deficit Grant (PDRDG) state ten an hmuh tur tlahniam zel thlirin hei hi a tul tak zet tih a sawi a. Finance Commission ten an recommend angin Professional Tax kum khat atâna lak theih zat bituk Rs. 2,500 chu tihsan nise, State te tân revenue hmuh belhna tur kawng a ni thei dawn niin a sawi bawk.

Taxation Minister hian PM-Devine chhunzawm zel a rawt a, Bamboo Link Road leh Aizawl By-Pass Road atâna sum Mizoram tan dah anih avangin lawmthu a sawi bawk. Minister Lalchamliana hi Vanlalchhuanga, Principal Secretary, Finance Department in a tawiawm a ni.