Champhai DC laka FIR thehluh hmalakna liantham la awm lo

Admin - Jan 01, 2022

Vanramchhuangi FIR thehluh pawh la zirchiang

Aizawl : Champhai DC Maria CT Zuali'n Burma atanga Kuhva phurh luh avanga hmalakna a kalpui mekah Kuhva trip thum hal anih avangin lakah FIR thehluh a nih hnuah hmalakna liantham a la awm lo a, chhui mek a nih thu dawn a ni a, chutihrualin amah thlawpna thuchhuah siam erawh an pung chho zel.

Kelkang daia kuhva halsak avanga Maria CT Zuali laka FIR thehluh-ah hian Police lam chuan hmalakna an la nei thui vak lo niin Champhai police atanga ZALEN thudawnna chuan a sawi a, hmalakna kalpui tak tak dan a la awm loh thu a sawi bawk. Champhai DC pawh hian police lam atangin engmah zawhna a la dawn loh thu a sawi a, a case chungchangah sawihona engmah a la awm loh thu a sawi ve bawk.

Champhai DC chuan Kuhva tawlh chungchangah hmalak chu thil harsa tak a ni nih thu a sawi a, hmathar lak dan tur tha awm se a duh. Hei vang hian Kuhva tawlin nghawng a neih dan zirchianna neih a ni tur thu a sawi a ; Mi rilru-a nghawng a neih dan te, nitin nunphung leh economic lama nghawng a neih dan thleng zirchianna neih an tum thu a sawiin, hemi atana hian mithiam bik rawih an tum thu ZALEN a hrilh.

Hetihlai hian Social Activist Vanramchhuangi chuan Officer-in Charge, Champhai Police Station-ah FIR a theh lut a,  Myanmar atanga kuhva leh bungraw dang (Border trade items) rawn kal velah hian Zokhawthar lam Land Custom Station(LCS) kaltlanga sumdawnna hi official record-ah tlem te anih laiin Mizorama bungraw lo lut hlutna Myanmar Ministry of Commerce Website-in a tarlan danin Rih Sector record ah chuan October 2020 atanga 30 September 2021 thleng khan, sumdawnna che vel (Trade volume) hi Dollar maktaduai 164.413 anih laiin India atanga Myanmar in a lak luh(Import Trade Volume) ve thung hi Dollar maktaduai a ni thung niin a tarlang a.

Tarlan a nih zel danin hei hian chiang taka a lantir chu Myanmar atanga Mizoram (India)-ah lakluhna record fel tak, chhiah(Custom Duty + GST) luhna record hmuh tur a awm lo, tiin Champhai DC tan zawng hian FIR a thehlut ve leh a, he thil pawh hi hmalakna a la awm lo a, police lam chuan thil awmdan an chhui chian mek thu an sawi rualin commercial offence a nih avangin ngiahtuah ngai tak a nih thu leh dan lama mi thiam te pawh rawn an ngaih tur thu a sawi.

Champhai DC Maria CT Zuali thlavang hauh a, Kuhva hmanga sumdawnna duh lo zingah pawl thuchhuah siam tawh hi pawl 20 chuang an ni tawh a, heng zingah hian Champhai-a pawl 7 an tel a, Khaw hrang Thalai pawl hrang hranga bakah Central YMA leh MHIP lam te pawhin an thlawpna thuchhuah an siam a, In leh lo a neihna Mission Veng YMA pawhin December 30, 2021 khan an thlawpna thuchhuah an siam.

Champhai DC-in dan lova sumdawng bungraw phur vel chet phal lohna thupek a chhuah hnu hian, Khawzawl leh Serchhip DC te pawhin dan lova sumdawng lirthei chet vel hi an lo khap tawh bawk.

Share now