ZALEN September 3, 2023 : Champhai district-a khaw pathum -  Bulfekzawl, Hmunhmeltha leh Lianpui khuaah te tun hnai khan vawk natna chi khat, African Swine Fever (ASF) a leng thar leh a, heng khuate hi ‘hri lenna khua’ atan puan thar leh an ni.

ZALEN-in AH & Vety department thawktute hnen atanga thu a dawn danin ASF leng thawh thumna (3rd)-ah hian Champhai district-ah vawk 154 an thi tawh a, ASF hri vei nia hriat vawk 202 suat a ni tawh bawk.

ASF vanga vawk thi hi Champhai bakah Kolasib, Mamit, Aizawl, Lunglei leh Khawzawlah te an awm a; mahse, Champhai district aia tuar nasa an awm lo a ni.

ASF thawh thumna leng thar lehah hian district 6 a khaw 21 a tuam mek a, AH & Vety department chhinchhiah danin 3rd wave-ah hian vawk 667 chu hri vang hian an thi tawh a, hri vei nia rinhlelh vawk 312 suat an ni tawh bawk a ni.

ASF vanga vawk thi hi report lo an awm avang leh finfiah loha vawk thi an awm bawk avangin chhinchhiah ai hian a tam zawk a rinawm tih Vety department thawkte chuan ZALEN an hrilh bawk.