ZALEN August 04, 2026 : Ni thum chhungin LESDE Labour Link LPS Pro Fight-a tel tum mi 60 chuangin entry form an la chhuak a, August 31 thleng hun hawn a ni.

September 9, thawhlehni zan khian LPS Arena, Falkland-ah Pro Fight vawi 12-na tan a ni dawn a, August 1, inrinni atangin tel tum tan form lak chhuaha theh luh theihna hun hawn a ni.

Ni hnihna thawhtanni tlai thlengin entry form pek chhuah tawh aṭangin mi 10 chuangin an theh lut tawh a, heng zingah hian hming langsar tak awm lo mah se flyweight-a quarterfinal lut tawh Benjamin Lalrindika a tel. Ani hi professional huanga tawn hriat nei tawh niin a hma zawng aia thleng san ngei tumin a inbuatsaih a ni.

Kg 48 atanga 52 inkar flyweight-a khelh tumin Lalremthanga Hmar chuan form a theh lut tawh bawk a, kum 30 mi Sakawrdai tlangval hian 2025 LPS Comedian Search atangin hriat a hlawh hle a, boruak nei tura ngaih a ni. Remthanga hian 2015 atangin boxing a khel tih sawiin tun hi Pro Fight-a a tel vawi rukna tur a ni a, Comedian Search bakah LPS Youth Icon-ah te pawh a lo tel tawh thin a ni.

LPS Office, Zarkawrt leh Dozoma Optical, Canteen Kual, Dawrpui atangin LESDE Labour Link LPS Pro Fight-a tel tum tan Rs 10-in entry form lak chhuah theih a ni a, August 31 thlengin a theh luh theih a ni.

Hriat theih chinah Aizawla boxing Gym 15 vel leh Lungleia Thanlian Fitness Club-ah Pro Fight vangin boxing zir a let dawnin an pung chho tawh a ni.