March 21, 2022; Zanin dar 6:40 bawr vel khan Champhai Kahrawt veng (Thlerpui, Taitesena section) ah bungrua engmah chuh hman loh in chenna in 5 (chhungkaw 8 luahlai) a kangral vek a, mihring thi leh hliam an awm lo nia hriat a ni a, bungraw kangchhia hlut zawng hi he thu ziahlai thlenga hriat theih chin ah cheng nuai 114 bawr vel a tling.

Champhai Kahrawt khawtlang hruaitute hnen a tanga ZALEN thudawn danin, bungraw chuh hman loh a in kang neitute hi Pu K. Lalbiakkunga (concrete building chhawng thum leh a bul a anmahni in tho assam type chhawng 3, chhungkaw 5 luah) leh Pu HB. Lalbiaksanga (semi RCC) bakah, Pu Zothanglawra in (Assam type chhawng 2) te an ni a heng bakah hian Pu Hmingdailova in chu a chanve a kangkai hman a, kangmei in a kankai hlauhthawn vangin Pi Chalhliri in chu thiah a ni bawk.

He thu ziahlai hian kangthelh leh in kang senghawi tul danga khawtlang an la buai avangin chanchin kimchang tak hriat hleih theih a la ni lo a, thudawn danin, bungraw chuh hman loh a in 5 kang hi chhungkaw 8 luahlai niin, Upa K. Lalbiakkunga te ranvulh vawk 15 an kanghlum.

Kangmei hi inhnuailam a vawk chaw an chhumna atanga intan nia hriat a ni a, kangmei chhuah tan zan dar 6:40 bawr atangin kangthelh hna leh kangmei nasa zel tur ven hna ngawrh taka thawh nghal niin, zanin dar 9:30 bawr vel khan thelhmih fel a ni.        

Champhai Kahrawt atanga thudawnna chuan fire department lam rang takin rawn che chhuak mahse, khua a ro vangte, gas puak ringawt pawh pali a awm avangte in kangmei a chak a, chu chuan thelh a ti harsa tih sawiin, zanin atang khan inkang senghawi hna a theih ang anga thawh nghal a nih thu leh naktuk lamah huamzau zawk a thawh a nih tur thu a sawi.

Zanin khan Kahrawt khawtlang hruaitute leh Disaster management lam pawh thukhawm nghalin, chhawmdawl hna thawh dan turte an rel nghal a, an theih ang anga kangmei hlut zawng an chhut chinah cheng nuai 114 hu vel chu a kang chhia anga ngaih a ni.

KANGMEI TUARTU CHHUNGKUATE:

Pu K. Lalbiakkunga (RCC building chhawng 3, Assam type chhawng 3 luahtu te: Lalveni, Lalianthangi, Lalllianzuali, K. Lalramchhana, C. Lalduhawma)

Pu Zothanglawra (Assam type chhawng 2)

Pu HB. Lalbiaksanga (Semi RCC)

Pu Hmingdailova (Assam type, a chanve kang)

Pi Chalhliri (Kangmei in a kankai hlauhthawn vanga thiah)