Aizawl: Champhai district NGO Coordination Committee chuan national highway No.6 laih mekah mi thenkhat ten harsatna an siam chu pawi an tih thu sawiin naktuk Thawhtanni thlenga hmalakna a awm loh chuan a tul anga thenfai hnatlang koh an rel.

Thudawn danin National Highway Infrastructures & Development Corporation Limited (NHIDCL) hnuaiah National Highway No. 6,  'Seling to Champhai Double Lane' kawngpui laih thar mek chuan Dulte leh Kawlkulh khua a tlawh dawn loh avangin mi thenkhat chuan kawng siamtu NHIDCL Company hnuaia Contractor te chu an bungrua leh khawl thil lakluh tur te an dang a. Hemi chungchangah hian Zirtawpni tlai khan Khawzawl Police station ah Champhai NGO Coordination Committee hmingin First Information Report (F.I.R.) thehluh a niin Kawlkulh khaw chhung, Puilo khaw panna peng bula hnathawktute danna tur gate chu May ni 17, 2021 ral hmaa thiat tur leh kawngpui sialtu te tibuai zawnga khawsa leh hma latute chhinchhiah sak a, a tul anga hma la turin an ngen a. FIR ah hian Muana Hangsing, NGOCC Secretary in hming a ziak hnan a, FIR thehlut tur hian NGO hrang hrang hruaitu mi 21 Champhai atangin Khawzawlah an kal a, FIR an thehluh hnu hian Khawzawl DC Zothanmawia an hmu nghal a ni. 

ZALEN in Champhai district NGO Coordination Committee chairman Lalnunmawia hnen atanga thu a dawn danin an huntiam May ni 17,2021 ral hnu pawha a tha zawnga hmalakna a awm loh chuan a tul anga hmalak chhunzawm an tum tih a sawi a. An harsatna tawh chung-chang hi sawrkarah pawh an lo thlen tawh niin a sawi bawk.

Zirtawpni khan Champhai District chhunga pawl hrang hrang hruaitute chu Champhai MJA Press Club-ah an thukhawm a. Meeting chuan NH 6 Jorabat (Assam) to Champhai hian Shillong, Delashwari, Kawnpui, Aizawl leh Seling kawng awmsa ring a, Seling leh Champhai inkar laih chhunzawm tura tih chu sawrkar laipui MoRTH leh Mizoram sawrkar remtih (Road Alignment Approve) anga  Contractor-te hnathawk tura tih a ni an ti a. Kawngpui laih mek ti khaihlak leh dodalna awm chu tha a ti lo va, Gateway of South East Nations kawng siam meka harsatna sukiang tur hian a tawp thlenga tan lak nise, tih thuanawp tum emaw dodaltute chu khawchhak tlangdung mipui ten an hmachhawn zel dawn tih an rel a. Kawngpui siamtu te'n hna an thawhzui nghal theihna turin dipdaltu awm apiang a tul anga thianfaia hnatlang neih ni se, an ti.