Pro-Fight hmawr an bawk hnai tan a, boruak pawh a sang chho viau a, Zirtawp zanah entu an pung a, Hawla Indoor Stadium, Republic Vengthlangah hriat hlawh tawh tla an awm ta nawlh nawlh a, boxer tha tak tak an inlar zel. Zirtawp zanah pawh he Pro-Fight a champion hmasaber Laldinsanga, Khatla a chak zo lo a, Lalrinawma'n round khatnaah Lalrinnunga knockout-in awlsam takin lightweight semifinal a lut a, lightheavyweght quarterfinal-ah a chet mawi loh avangin round hnuhnung berah J Vanlalhruaia disqualified a ni a, M Hunter Hnamte chuan semifinal a lut. NT Lalbiakkima'n harsatna lian tawk lovin F Lalmuanzuala a hneh a, lightfly semifinal a lut. Bantam-ah mittlung takin James Laltlanmawia a inlan a, 2009 lightfly champion H Laldinmawia beiseina tihtawpsakin unanimous decision-in a chak a, D3 Fighter of the Night lawmman a dawng. Middleweight-ah Lalbiaknia'n C Lalnunsanga lakah inhnek thununin unanimous decision-in quarterfinal a paltlang bawk. Zanin leh naktuk zan hian inhnek hi an chawl ang a, Thawhleh zan atangin semi-final lut tur zawnna neih leh a ni ang Lightfly Kum 18 mi Biakkima'n a laka beiseina awm mek tihlawhtling zelin, amah aia tawn hriat nei tam zawk kum 23 mi Muanzuala hmaah nuam ti takin a khel a, unanimous decision-in a chak. Saiha rawlthar Biakkima'n kawng tinrengah inhnek thunun hneh hle mah se a tumpui hnehsawh taka hruihrual chhunga a chet vel dan avangin sawiselna a tawrh phah a, hruihrual kilah a tumpui huiin a inhnektir a, ani'n rang takin a hnek let ve thung a, mipuiin lawm viau mah se thenkhatin amah an huat phah ve thung. Sihphir Venghlun boxer Muanzuala'n thiamna chi hrang hman kawngah Biakkima a khan lo va, a tuan a fum zawk bawk a, a tuar tam hle. Round tawp lamah a kechheh buaiin a tlu hma hle a, round linaah Biakkima'n a kut ding lamin a hnek fuh a, na tawk lo mah se Muanzuala tluin referee Jerry MS Zadeng chuan a chhiar a, 40-36, 40-35, 39-36 in Biakkima a chak. Bantam Maubawk beisei James-an boxing tha tak a lantir ve thung a, kum 35 mi Dinsanga theihna chungtlakin 40-38, 39-38, 39-38 in a chak. An inbeih chhung zawngin nung takin kum 21 mi James-an a khel a, tuan rang zawk a nih bakah a che vel a zangkhai a, veteran Khatla boxer Dinsanga'n a tir lamah harsatna tawkin round hnuhnung lamah insiam remin tha takin bei let thei mah se a dinhmun a siam tha zo lo. Rang leh dik taka hnek fuh tam zawk James-an phu takin hnehna a chang a, zirtawp zana fighter tha bera thlan a ni bawk. Boxer pahnihte hi lightfly huanga khel thin ve ve niin 2010 khan James-an a hming a chher hle na a, a vawrtawp a thleng zo lo va, Pro Fight hmasa ber 2009 khan Dinsanga'n lightfly title lain championship kal mi pahnih a hneh hnuin weight hrang pahniha champion hmasa ber nih a tumna puitlin zo lovin a tla a, tun tumah hian bantam-ah boxer tha an tam a, quarterfinal lut pha lovin 2010 lightfly champion ZD Lalchhuanawma a tla tawh a, champion hlui pahnih an tlakna a ni. Light Champion lai Anthony Lalduhawma cho thei tura beisei zinga mi, Reiek boxer Rinawma'n harsatna tawk lovin rei lo teah tawn hriat nei lo huang atanga tlang kum 24 mi Rinnunga a hnek tlawm. Round khatna an tan rualin Selesih boxer Rinnunga'n nawr nghal mah se Rinawma'n a bei let hneh hle a, thiamna leh kawng hrang hrangah boxer pahnih an inthlau va, kum 21 mi Rinawma'n a kuttum vei lamin a nak ding lam hnuaiah na takin a hneksak a, chhuatah Selesih boxer tluin a che chang zui lo va, referee T Lalthlengliana'n chhiarin tam a chhiar hmain inhnek a titawp nghal a, Rinnunga buaipui zui niin rei lo te hnuah a tho chhuak leh thei. Rinawma hian a hmain round khatnaah bawk Lalchhuankima a knockout tawh a, vawi hnih a inhnek tawhah round khel tluan lovin a chak ve ve a, hnuhma tha tak nen kar leh nilai zanah semifinal a hmachhawn ang. Middle Chak tur zawka rin sa West Phaileng boxer Biaknia'n Nunsanga hmaah harsatna tawk tlem hle a, unanimous decision-in chak mah se a hmaa an inlan tawh dan ve ve atangin beisei angin a nuai hneh bik lo va, fei takin kum 31 mi Nunsanga'n a bei let tluan a, a bet zawk ni chungin chiai thui duh lovin a hnek let ve reng. Boxer khawng tak tak Dengthanchhunga leh Ramluahpuia a hneh tum angin kum 21 mi Biaknia'n mit a tlung zo lo va, chutih rualin thiamna leh kawng dangah Khatla boxer a thunun thei a, harsatna tawk lovin 40-36, 39-37, 40-36 in a tlang. Lightheavy Mipui hmuh chak leh tawn hriat inang lo pa lian boxer pahnih an innuai a, round thumna thlenga che tha zawk Rangvamual boxer Hruaia'n round hnuhnung berah harsatna lian tak a tawk a, vawi khat aia tam mawi lo taka dan a bawhchhiat hnuin referee Lalduhzuala'n mualphothlak takin a tlawmtir a, Nursery fighter Hunter-an semifinal a lut. Round linaah kum 25 mi Hruaia a chau hle a, an inpawmchilh laiin a tlu fo va, tho zui mai duh lovin hun a khawhral thin a, Duhzuala'n chhiarin a point paihsak a ni. Hemi hnu hian thinrimin Rangvamual boxer hian a tumpui a bei zui a, hruihrual pawnah nawr chhuakin lu vit zawngin Hunter-a a tla a, Hruaia'n a hnek zui nghe nghe. Duhzuala'n dan pela a chet avangin a point a pointsak leh. Round a tawp tep tawh tihin Hruaia'n a khingpui tan tawrhna thlen ngei tumin a bei zui a, dan pelin a kawnghren hnuaiah a hneksak a, Hunter-a tluin Duhzuala'n inhnek a titawp a, lawmman dawng thei lovin Rangvamual boxer a disqualified. Pro Fight kal meka referee-in tlawm dan chhe tak disqualified hmanga an tlawmtir pahnihna niin lightweight-ah mawi lo taka a chet avangin H Vanlallawma disqualified a ni tawh a ni. Kum 2000 chho vela Mizo boxer tha zinga mi kum 35 mi Hunter-an Pro Fight a vawi khat khelhna a ni a, beisei angin a inlan zo lo va, hnek tluk tuma na taka a ding lam a vai chhuah bak thiamna tha a lantir tlem hle. Pro Fight hmasa ber 2009 atanga boxing luhchilh ve chauh Hruaia'n Hunter-a dang theiin ban sei zawk a nihna chhawrin tha takin a hnek let a, an innuai dun nasa hle. Round thumna thlengin judge pahnihin Rangvamual tlangval an dah sang zawk a, round hnihah an chaktir ve ve. Mahse, thahrui nei fei zawk Hunter-an mar tha taka a khelh laiin round thumna tawp lam atangin Hruaia a chau chhe hle a, insiam thar leh zo lovin a dinhmun a pawt hniam a, a tawpah a mualpho phah ta a ni. Pathianni leh thawhtanni awlin September 23 (thawhlehni) zanah semifinal chhunzawm a ni dawn a ni. LPS Pro Fight 2014 September 19 (Zirtawpni), result Attendence - 1300 Quarterfinal Lightfly NT Lalbiakkima (Saiha) bt F Lalmuanzuala (Sihphir Venghlun) Result - Unanimous decision (40-36, 40-35, 39-36) Bantam James Laltlanmawia (Maubawk) bt H Laldinsanga (Khatla, MPCS) Result - Unanimous decision (40-38, 39-38, 39-38) Light Lalrinawma (Reiek) bt Lalrinnunga (Selesih) Result - Knockout (Round 1) Middle Lalbiaknia (West Phaileng) bt C Lalnunpuia (Khatla) Result - Unanimous decision (40-36, 39-37, 40-36) Lightheavy M Hunter Hnamte (Nursery) bt J Vanlalhruaia (Rangvamual) Result - Disqualified (Round 4) D3 Fighter of the Night - James Laltlanmawia (Maubawk)