League-ah final an khel ngai em tih lam sawi kan tum lo a, 1st leg leh 2nd leg khelh si a, away gole rule in awmzia a neih leh chuan loh chungchang pawh sawi kan tum hek lo. Mahindra 2 Wheelers Mizoram Premier League Season 2-ah league hmahruaitu Chanmari FC an champion tih leh Luangmual FC-in an chak loh dan pawm harsa an ti hle tir erawh kan sawi lang ang. Mahindra 2 Wheelers Mizoram Premier League Season 2-a a sang pahnih ten champion nih an inchuh a, vawihnih inkhelin vawikhat ve ve an chak a, goal thun hnem zawk Chanmari FC an vannei a tih theih ang a, a lehlamah tun season-a an chet dan thlir erawh chuan an phu. Inkhelh hmasa zawkah Luangmual hian rin phak baka tha-in an khel a, chak an phu zawk hliah hliah a, an chak ta bawk a, a hnuhnungzawkah pawh beiseina sang tak neiin an rawn inlan a, Lammual chhim lam a eng tuar a, Lungmual, Luangmual tih tih thawm a ring a, mahse, an beisei angin thil a kal lo a, game kengkawhtu thutlukna pawm harsa an ti a, an duh bakin an che a, dem an hlawh. A tawpa an chet dan erawh a mawi a, an khingpui te lakah thinrim an ni lo a, thiam takin an lawmpui thei. Hmarlamah Chanmari FC fans te an inkulh a, anni pawh an thawm a tha. Anni hian eng game pawh khel se, hla pui an nei a, chu hle ngei chu a tir atangin an sa a, a tawp thlengin an sa tluan a, khelh hmasaka chak lo Chanmari FC chu a tawpa lawm zawkah an tang ta thung. MPL 2-ah final khelh hnihnaah hian a tir lamah chungnung han tih nghal tur an awm lem lo, hmahruai zawk Luangmual lamin hun tha an insiam hma zawk a tih theih a, mahse, uihawm khawp hun tha bawhpelh erawh an ni lem lo. Chanmari lam pawh hian an nawr ve tho bawk a, anni lam pawhin han ui em em tur an nei bik lo a, half-chance han tih tur hi chu a ni ve ang. Minute 37 na a inherchhuak a, Chanmari FC player Lalrinsanga leh Lungmual FC player MC-a te chu penalty area chhungah an inkhak a, Rinsanga a tlu. He thil thlen dan hi inhnial theih tak a ni a, Referee chuan Chanmari FC tana lawmawm zawk turin thutlukna a siam a, Best player atana thlan zui tak R. Malsawmtluanga chu rawn dingchhuakin chiang takin a thun a, khelh hmasa lama an score nen 2-2 chiah a ni ta. Inkhel boruak a sang sawt a, mahse, 1st half-ah goal dang a luh belh lo. Chawlhlawk hman a nih hnuah Chanmari lam chan a rawn tha nghal a, minute 10 vel chiah an la khel hman tihin dinglam kil atanga Fela Zote cross tawih zet mai chu harsa lem lo takin H. Lalmuankima chuan an goal hnihna ni tur leh sikhata hma an hruaina ni turin a thun zui a, phur pawh an phur chho hle, Minute 58 na a rawn inherchhuak a, Jerry Mawihmingthanga chuan chiang ang reng takin a pet lut a, he goal a luh hma hian Chanmari FC player pakhat chuan a kut-in a lo khawih zeuh niin a lang a, mahse, referee chuan goal-ah a pawm. Hei hi Luangmual FC player lamin an hrethiam lo a, a hma lama penalty an lo chawi tawhna nen an paidam thei lo a, an player thenkhat ten tawngkam an duhtui lo deuh nge referee chuan Nunpuia leh Sawmtea te a hnawtchhuak a, pawn lam boruak pawh a sang chho hle. Chanmari lamin an nawr zui a, mahse, goal an thun belh hleithei bik lo a, inkhelh tawp dawn lamah Luangmual fans lamin mi tihdan tha lo an rawn entawn a, inkhelh a bahlah zui a, player ten field an chhuahsan hial a, mahse, rei vak lo hnuah inkhel chhunzawm leh a ni a, a tawp zui nghal ta mai bawk. Buaina erawh a awm chhunzawm ta lo. Tun tum Mahindra 2 Wheeler Mizoram Premier League-ah hian champion ta Chanmari FC hian mimal chawimawina pawh an hui hnem hle a, chung zingah chuan Best Goalkeeper, Best Defender leh Best Forward te a tel a, an midfield kulhpui R. Malsawmtluanga hnenah Best Player hlan a la ni zui bawk. Goal 8 thuna tun tuma khung hnem ber Mizoram Police FC striker Lalbiakhlua chu Top Scorer a ni a, mual chhunga Luangmual FC game kaihruaitu leh inghahna Reuben Zosangpuia chu midfielder tha bera thlan niin Best Midfielder award hlan a ni.

Mimal Chawimawina Best Player - R. Malsawmkima, Chamari FC Best Goalkeeper - Lalawmpuia, Chanmari FC Best Defender - Zothanpuia, Chanmari FC Best Midfielder - Reuben Zosangpuia, Luangmual FC Best Forward - MS Dawngliana, Chanmari FC Top Scorer - Lalbiakhlua, Mizoram Police FC