Resolution
1. Mizoram sawrkarin kan grape tharchhuah leinaah a tlem berah Rs. 5 (per kg.) price support min siamsak rawh se.

2. Grape atanga siam Champwine, Dt 27/5/2022-a excise department-in an mante hi a bo a bang awm loin pe let leh ngei rawh se.

3. Kum 2022-a kan grape tharte kan lungawina tawkin Mizoram sawrkar hian min leisak rawh se.

4. Mizoram sawrkar hian grape chingtute lungawi lohna lantir a nih hma ngeiin grape atanga siam ‘Champwine’ hi man tawh lo se la, zalen takin min hralhtir rawh se.

Aizawl; Champhai Grape Growers’ Society chuan resolution siamin grape atanga siam, ‘May 27, 2022-a excise department-in Champwine an mante chu a bo a bang awm loin pe let leh ngei rawh se,’ an ti a, ‘grape atanga siam, Champwine chu man tawh lo se, zalen takin min hralhtir rawh se,’ an ti bawk.

Inrinni khan Champhai Grape Growers’ Society chuan Champhai Tlangsam winery-ah assembly an nei a, resolution pali lungrual takin an pass a ni.

Champhai Grape Growers’ Society-a an general secretary, C. Zohmingliana hnen atanga ZALEN thudawn danin, tun dinhmunah an winery a grape tui sawr sa, wine a siam mai theih tawh (non-fortified) an dah mek zat chu litre 1,12,089 a tling a, chung bakah chuan wine-a siam zawh tawh, bottle-a thun mai theih litre 2,709 an dah mek bawk.

Hetihlai hian excise lamin Aizawla grape wine zawrhte an mansak hnuah nimin khan grape wine zawrhna dawrte khar chhunzawm an ni a. ZALEN thudawn danin excise lamin an dawr chabi te an kawlsak vek a, dawr neitute chu Rs. 3,000 chawitir an ni bawk.     
Tun hma lam chuan Mizoram hmun hrang hrangah grape wine zuar (vendor)-te association angin an indin thin a, tunah erawh an license-te chu renew theih a nih tawh loh avangin association ang pawhin an ding thei tawh lo a, hemi vang hian grape wine zawrhna dawr awm zat pawh chiang taka hriat theih a ni lo.