India chuan khawvel chanchina bung thar ziakin thla chhim tawpa tum hmasa ber a ni ta.

India hian khawvel ram changkang tak tak pali - US, Soviet Union leh China hnungzuiin thlaa him dam taka tum thei a ni ve ta bawk.

Chandrayaan-3 ken tel Vikram lander hian Nilaini tlai dar 6:04 khan thla leilung tawkin him takin a tum a ni.

Thla leilunga a inkap kai thei hi India ram pumah lawm a ni a, Prime Minister Narendra Modi chuan, “Tunah chuan India chu thlaah a awm ta,” tiin a sawi.

“Khawi ram mahin an la tih theih lohna lai kan thleng a, hlima lawm hun a ni,” a ti a. Modi-a hian Brics summit-a a tel mekna, South Africa atangin thlaa Vikram a tum lai hi a en ve a ni.

Indian Space Research Organisation (Isro) chief Sreedhara Panicker Somanath chuan hlawhtling taka an tum thei chu ‘keimahni thawh chauh a ni lo va, Isro scientist chhuan kal tawh zawng zawngte thawh rah’ a nih thu a sawi.

Isro dintu, Vikram Sarabhai hmingchawia a hming phuah lander-in thla leilung a rah dawn lai hian nghahhlelhna leh rinhlelhna a tam hle a. Vikram hian a dulah kg 26-a rit rover, Pragyaan a keng a, hei hi Sanskrit tawng niin ‘finna’ tihna a ni.

Lander thlawh chak zawng hi second khatah km 1.68 atangin zero dawnah tihmuan a ni a, hei hi thla leilunga him dam taka a tum theih nana tih a ni.

Scientist-te chuan vaivut khute a ziaawm hnuah, a tum atanga darkar reilo teah ke ruk nei rover hi lander dul atangin a tawlh chhuak ang a, thla leilunga lung leh khuar awmte a fang ang a, lei lamah a thil hmuhte a thawn leh dawn a ni.