Zirtawpni khan Chapchar Kût lawmna pui ber — Aizawl-a Lammuala Kût hman chu kum dang zawng aiin a hlawhtling niin a lang a; chutihlaiin, programme fel tawk lo a awm deuh niin a lang e! Heti chung hian, Aizawl-ah chuan tlai dar 5 velah hlawhtling takin Chapchar Kût kharna hun hman a ni. Kumina Chapchar Kût hmanah hian thil lawmawm deuh deuh leh programme thar hmuh tur a awm rualin, kalsan chakawm tak mahse kan kalsan hleih theih loh khawp thil kan la nei a; he’ngte atang hian thil thar zir tur tam tak kan la neiin niin a lang. Ni khat chhunga engkim khunlen kan tum hi a fuh chiah em? Chapchar Kût 2014-ah hian kan zaithiam neihte an che tha hlawm viau a; kumin bika Kût ti hlawhtling ber ber te an niin, lawm pawh an hlawh hlawm viau. Chapchar Kût 2014 chu hman nawn leh sak ila... Kumtin kan Kût ve deuh ziah a, fiamthua an sawi thin — “Nakkuma Chapchar Kût hman leh dawn tur pawh ka sawi lawk thei ang,” an lo tih fiam thu ang ngeiin, kuminah pawh kan kût dan kalphung a la ngai deuh reng a. Chutih laiin, kuminah erawh kum hmasa lama kan hmuh te hmuh tur a awm tam tawh lova; kan hmuh ngai loh te min thlir tir an nei kha a fuh hle. Sawi tur a tam a, sawi vek sen pawh a ni lem lo. Thlirna tlang dang atangin — Chapchar Kût 2014; ‘fuh’ leh ‘hmaih’ hun i’n hmang teh ang! Pawnto leh Naupang parade! A tam zawkin kût kan hman theih ngeina atana naupang tana item hlu tak leh bengvarthlak tak - Pawnto an han buatsaih te leh Mizo incheina thuam nena naupang an han ‘parade’ hul hul kha chu hmuh a nuam thlawt a, programme pawh an duang thiamin ngaihtuahna fing tak a ni — KZP pir vah! MHIP Par-Lâm Programme tul lo tak leh awmze nei lova hun khawhralna a ni! MHIP lamin lo ngai haw lo se, Chapchar Kût-a par lâm entir kha engnge a tangkaina ni ang aw tih hi thlirtu lam pawhin an sawi duh viau. MHIP Day-a branch pakhatin item neih ve tum si, eng item ber nge an neih dawn hre bawk si lo, tih loh aiah par lâm an ‘show’ ringawt tawk vel lek hi Chapchar Kût-a an entir hi a fuh chiah lo em? Hei aia programme zangkhai leh manhla zawk te dipdalna hmanrua leh hunkhawh ralna satliah mai mai a ang mah zawk! VIP Kût Eng emaw tihkhawm let let a nih tawh hi chuan, khuallian neih loh hi kan thiam ta meuh lo a, mipui hmachhawn zawnga thutna nuam taka thut tum hmuk angte hi chu Chapchar Kût-ah chuan ching tam lo ila a fuh zawk ang em? Chapchar Kût angte hi chu tuna kan hman danah hi chuan tu VIP hote emaw festival pual bik hi a ang riau tawh a. Mi zawng zawng huap, Kût boruak phawk chhuak thei turin a pui a nawi thlengin lawm tlang dial dial ila. Kan awmdan leh programme kan ruahman danah te pawh hian tuna kan kalphung ang lo deuh hleka kal dan kan ngaihtuah chhuah thiam pawh a hun ve tawh viau asin. Cameraman Kût! Hetiang hunah hian thlalatu lam hi kan tam a, a tha e. Mahse, mi dipdal khawpa lo inlak ‘photographer’ lam hi kumin chu hmuh tur a vangin, hmasawnna lian tak a ni! Kumdangah pawh kan chhunzawm zel a duhawm hle mai. Hetihlai hian, thlalatuin thlalatu bakah mipuiin a hliah khuh tia an rawn puang thin erawh, a zia vak tlat lo. Chapchar Kût hi cameraman kût a ni lova, mipui kût a nih ang ngeiin, lo hliah khuh deuh mah se, lo insiam rem dan an lo inbuatsaih lawk tur a ni. Chuti ni lova, mipui hnawt tiau a camerman lam dah pawimawh viau hian kan kût hlutna a ti bo! Kan programme duan dan mawlh hi Programme kan duan danah hian hma kan sawn thei lo lutuk hian thaw a ti i-pik. Mipuiin tel ve an châkna programme a tlem tawh nak laiin, zaithiamte’n hun an hman zawha programme dang kalpui a ni leh thin a. Hei hian mit a ti kham fu. Chawhma lamah ground hi luh phal lovin, mipui lâm hut hut theihna tur lam hi buatsaih lo mai se, chawhnu lama zaithiamte pual liau liau leh mipuiin an bawr zawh hnua hnawh tiau leh ngai lo turin programme hi ‘set’ mai se la a va duhawm ve maw le. Sap tawnga thupuan Hetiang hunah hian hnamdang hmel kan hmu fo a, an hmuh belh zel te pawh lo inbeisei ila. Chutihrualin, Mizo Kût ngei maia hnam dangin an hriat loh hlau niawm hrimin sap tawnga hrilhfiah kher kan han tum thin hi chu a zahthlak lek lek zawk. Sap ngaihsanna zia an pho lang lekah a ngaih theih hial awm e. Kan hunpui neih ve ber, a Zo ‘spirit’ phawk chhuak thei ang ber tura kan inthuam a, hun hman kan duh laia sap tawng lo ri ve sek kha chu sap ho pawhin min nuih let zek mai thei a ni. An ramah kalin, an kût vel chhim ila, kan vun ang vun rawng an hmuha, kan kal an beisei ve a nih pawhin, Mizo tawngin thu an puan dup dup a rinawm hauh loh maia. Kan programme hman te an hrefiah duh anih chuan an zawt mai thin zawt a. Chuti a nih loh vek pawhin, lehkhabute-ah fiah fel fai taka ziakin sem chhuah ni zawk ta se, a inhmeh zawk fe lo maw? Mal Zai & Band Hetah pawh hian ngaihtuahna thar kan put a hun ve tawh khawpin a lang. Chapchar Kût-ah hian zai hi kan hun tawp lamah kan ngaithla mawlh mawlh a, a loin kan awm thei tawh lo a ni ber a. Mahse, tunaia Kût-a zai hi kan dah hlut zawk theihna’n kalphung thar kan mamawh e. Art & Culture lam chhulchhuak an nih avanga, zai tawh vak ngai lo kan khawrhchhuak chiam thin hian kan Chapchar Kût-a ‘zai’ hi a hlut dan a dang riau a. Khawrhchhuah loh tur chu ka ti hauh lo. Mahse, Chapchar Kût-a zai theih hi dah hlu zual sauh se, band a ni emaw, mimal a ni emaw te hi tawngpawng sawm chawt loh...tihna mai a ni. Chapchar Kût-a zai tur te hi a hmain thlanna te neiin, Beat Contest/Solo Competition angreng deuhte hi buatsaih thin ni ta se. Kan rimawi khawvela kan mi leh sa te kan dah hlu zual sauh anga, kan rimawi khawvel chawikânna a nih bakah kan tualchhung zaithiamte, band-te kan promote-na a ni tel nghal bawk ngei anga, kût pawh kan hmang rei ve deuh ang. Hnamdang Kûtpa Chapchar Kût a nih ang ngeiin khuallian a ni emaw, Kûtpa a ni emaw kan hmang a nih chuan Kût awmzia hria hi hmang ila. District thenkhata DC tin emawte hi Kûtpaah an hmang a, hei hi a fuh chiah em? Kût awmze hre map lo kan lo hmang anih chuan kan inngaihtuah chian a ngai. Pawisa an thawh hnem emaw thawh lo emaw, kan Mizo Kût hi rawn chhim zawk mai rawh se! Lawmthu sawi Sawrkar programme dang te, leh eng eng emaw function bikah te hian thusawina hun inpek te leh hunserh hman te hi a awm viau a, thuhma bakah lawmthu sawina hun hman te chu a awm viau a. Hetiang ti lo hian kan awm thei tawh lo tih pawh a chiang reng tawh. Mahse, kan Kût pui bera hetiang thusawina hun leh inlawmna hun hman te hi tawite neih pawh a sual em em lem lo, hunserh ber hi kan la hmang chut chut ania. Kristian ramah chuan tih turah kan ngai a ni mai thei e. Mahse, chung lam hnena inhlanna neiha Hunserh hman hi kan Chapchar Kût-ah chuan a tihchi ber dawn emaw ni le aw? Ringtu tha ber awm ziazanga hunserh hmang a, chumi hnua Kût zui leh hap hap hi thil inhmeh lo ve tak chu a ni. Hunserh tih loh thusawina hun dangte — Inlawmna thusawi, thuhma leh lawmthu sawina hun te nei lovin a semin sem ta zawk se a fuh zawkin hun a khawhral lo zawk ngeiin a rinawm... — sawi sawi ngai lo Kût la tawk!