Aizawl May 19, 2024 : Mizote kût zinga ropui leh ngaihhlut hlawh ber, Chapchar Kût 2024 Mizoram puma lawmnaah Rs. nuai 129.69 hman a ni.

ZALEN RTI zawhna, SPIO Art & Culture department-in a chhan danin district khawpui hrang hranga Chapchar Kût hmanna atan hian nuai 41.50 hman a ni a. Hei bakah hian Mizoram house hmun rukah Rs. 70,000, a vaiin nuai 4.20 pek a ni.

Aizawla Chapchar Kût hmannaa sum hman ralna langsar zingah cultural dance, Aizawl khaw pawn atanga lo kalte TA/DA, sound system, live telecast, stage siamna, souvenir, refreshment, zaithiam lawmman leh exhibition te chu a langsar zual an ni.

Kumin 2024 Chapchar Kût hmannaah hian hmun dang atanga sum hmuh (sponsor) Rs. 5,50,000 a awm a, chungte chu Zote motors Rs. 3,50,000 leh ZOS Enterprise Rs. 2,00,000 te an ni a. Hei bakah hian SBI Main Branch chuan Chapchar Kût Run t-shirt atana senso Rs. 3,00,000 an tum a. Hei hi department kaltlangin a siamtu company, Saksham Akas Das, Kolkata hnenah RTGS-a thawn a ni.

Zawhna chhangin Art & Culture department SPIO chuan sum ruahman hi Rs. 2,69,000 velin a indaih lo a; mahse, sponsorship atangin Rs. 2,69,000 hi hman a nih avangin a la bâng Rs. 2,81,000 an la hum thei niin a sawi bawk.