Aizawl August 7, 2024: Vawiin khan Khawbung khawtlang chuan an khawchhuak Prof Lalnilawma, Mizoram sawrkara Minister a nih lawmna leh chawimawina hun Khawbung Community Hall-ah an hmang a, Minister hian chawimawina hun buatsaih sak an tum thu an hrilh a hnar hmasak thu a sawi.

He hunah hian Prof Lalnilawma chuan Khawbung khawtlangin amah lawmpuina leh chawimawina hun an hmang chu ropui a tih thu a sawi a, an chhungkaw chunga khawtlang thatna chu an theihnghilh tawh dawn lo a ti. Prof Lalnilawma hian Khawbung khawtlang hruaitu ten amah chawimawina hun buatsaih an tum thu an rawn sawiin, mimal sum pek tur a neih loh avang leh sawrkar pawisa hman a duh loh avangin a hnar hmasak zet thu pawh a hrilh tih a sawi a, khawtlangin anmahni insengso a hetiang hun an buatsaih sak chu a lawm tak zet tih a sawi bawk.

Rural Development Minister hian Khawbung khawtlangin intodelhna leh hmasawnna kawngah hmabak tam tak an la nei tih a hriatpui thu pawh sawiin, hma an sawn zel theih nan theihtawp chhuah pui a tum thu leh tlanchhiat a tum loh thu a sawi bawk a ni.

Prof Lalnilawma hian hmasawnna rotling din a nih theih nan kalkhawm mipuite thawhpuina a ngen a, sawrkar hmalakna lo enpui thin turin a chah. Mipuite chu a department chan hnuaia hna lungawithlak loh a awm chuan a hnenah thlen turin a ngen a, hnathawk tha lo te a dim dawn lo tih a sawi bawk. Hmasawnna hna thawktute hnen atangin sawrkarin engmah lak heu sak a tum lo a, hna tha taka an thawh erawh a beisei let thung, a ti.