ZALEN January 7, 2024: Home department chuan hriattirna (office memorundum) tichhuakin police check gate hrang hrang - Vairengte, Zokhawthar, Kanhmun, Medilicherra, Champhai Khankawn, Saiphai, Phaisen, Bairabi leh New Kawnpuiah te police duty-ten dan kalhin lirthei leh mihring lutte atangin pawisa an khawn tih hriat a ni a. He thil hi ti tawh lo tura hriattir an ni tiin sawrkar chuan an en zui zel dawn niin an tarlang.

Home department thuchhuah chuan mi tu pawh hetianga thil ti hria an awm chuan thuneitute hnenah report turin an ngen a, an hming leh nihna thup a ni dawn tih an sawi bawk.

District Superintendent of Police-te pawh a chunga tar lan check gate-ah te hian pawisa dil leh pek phal a nih loh thu hi Mizo, English leh Hindi-a thu ziak tar turin an hriattir nghal bawk.