Chelsea chuan Barcelona player Frenkie de Jong chu lei tumin an hel mek a, midfielder hi an lei thei mai dawn niin a lang. 

Dutch midfielder hi tun transfer window chhunga player hming langsar pakhat a ni a, Premier League club Manchester United leh Chelsea ten an lei duh ve ve a, Blues hian an hnaih de Jong hi an hnai tawh hle a, ni rei a ngai tawh lo maithei.

London club hian Barca lamin an chhiar angin Dutch midfielder lak chhuah nan hian € million 80 chuang an sen a ngaih hmel. De Jong-a chungchangah hian sawi neuh neuh a tam hle a, Blues lam hian an duh thlu ngang a niang a agent lam nen inbe mekin hun rei lo te hnuah an in biak rem rin a ni.

Kar kalta khan report thenkhatah chuan kum 25 mi hian Camp Nou a chhuahsan duh lo niin an sawi a, mahse a rilru a thlak leh ta deuh a ni mai thei. De Jong hi Manchester United pawhin an hel reng a, Premier League club lian hian £63million in an ngam a, Barcelona lam pawh hian phalin club ang chuan an inrem hman naa amah De Jong ber hian Champions League khel phak lo club a khelh a duh loh vangin mimal inremna an neihpui thei lo. 

Hetih mek lai hian sum leh pai lama harsatna tawk mek Barcelona chuan de Jong-a chu a hlawh tihniam deuh turin an nawr reng bawk mahse Dutch mi hian a pawm thei rih lo a ni. 

Barcelona president chhuak ta Josep Maria Bartomeu khan kum hnih chhung atan a contract pawhsei sakin tun season-ah hian €20m (£16.8m) hlawh turin an inrem a, season lehah phei chuan €25m (£21m) a hlawh thei dawn a ni. A rual hian Gerard Pique, Marc-Andre ter Stegen leh Clement Lenglet te pawh contract thar ziahpui an ni a, anni pathum pawh hi club lamin hlawh tihniam turin an ngen vek a ni.