Leicester City defender Wesley Fofana chu defence mamawh Chelsea lamin an it hle a, Foxes lam hian an player duhlai hi an hralh phal hlauh a nih chuan kar khata £200,000 zet hlawh tir pawh an hnial lo. 

Kum 21 mi hi an defence thuam chak nan Blues lam hian an it hle a, tun dinhmunah chuan a it mai ni lovin an mamawh hle niin an inhria. A chhan chu tun nipui chhung hian Antonio Rudiger leh Andreas Christensen ten free transfer-in an chhuahsan a ni. 

Leicester lam hian an player duh lai French youth international hi hralh an phalin a rinawm loh a, an hralh dawn a nih pawhin alo berah £85million aia tlem an chhiar dawn lo niin an sawi.

Season liam ta chhung kha Fofana hi hliamin a tibuai ve deuh reng a, tin kumin March thla lawk khan Foxes lama khel zawm turin kum nga daih contract a ziak thar a ni. 

Kar khata £200,000 hlawh tur a Blues thlemna hi Fofana hian a nep zo kher a ngem? Kum naupangte a nih laia club lian zawk Stamford Bridge lama khelh hi a chak ve ngeiin a rinawm. 

Tun nipui transef chhung hian Napoli atangin Blues hian Kalidou Koulibaly an lalut tawh a, Senegal international rual hian centre back tur Thiago Silva, Malang Sarr leh Trevoh Chalobah te an la lut tawh bawk. 

Chelsea boss Thomas Tuchel hian 3-4-1-2 formation a hmang nasa a, chuvangin central defence a mamawh tam a, a duh anga team thuam chak turin a player duhzawng a melh mek a ni. 

Fofana hian kum 2020 khan Leicester hi £36.5million zetin a zawm a, Foxes lama a kal hma hian Ligue 1 lamah Saint Etienne tan a khel thin a ni. Leicestershire lama a khelh hnu hian Fofana hi Brendan Rodger-a chhawr rim ber pakhat a ni.